迪士尼星級款待2012 響5月20日終於都完結了！再一次多謝咁多位 演藝人員 嘅努力！但事實上，雖然話就話完咗，但我上次入去，覺得同活動期間冇咩分別。除咗唔再派 星級徽章 之外，其他野都仲係繼續緊。例如，演藝人員 出黎同大家玩遊戲，樂團出巡等等。同時間，亦見到樂園方面好積極咁散緊貨。之前派嘅貼紙同珍藏卡，而家都幾張幾張咁派出去！如果去 市鎮會堂 問一問，佢會俾一大堆貼紙同閃卡你，更加有 綠色小人、彈弓狗 大貼紙送！
另一方面，活動完結之後，另一場尋寶記亦正式展開！
當中，樂園推出一套新嘅貼紙，我仲要搵得好辛苦... 因為今次唔係問平時遊樂設施嘅演藝人員，而係要去搵屬於唔同部門嘅演藝人員！我搵了保安，樂園服務，以及戶外商店嘅演藝人員，都只係搵到8款咋，仲有2款，下次要再接再厲啦！
但搵呢套貼紙期間，都發生了一個小驚喜！就係一位負責樂園服務嘅演藝人員姨姨，佢冇貼紙響身，但就送咗呢張珍藏卡俾我！我後來搵返資料，原來係來自2010年暑假嘅 迪士尼老友大召集！
上一次入去，除了儲貼紙之外，另一個主要原因，就係樂園出咗新嘅樂園指南，並以 灰熊山谷 同 反斗奇兵 Crossover！入面更加已經印有 灰熊山谷 嘅地圖，真係令人期待！
有樂園指南，又點少得樂園時間表呢？呢排樂園用唔同嘅 米奇 造型黎設計時間表，我今次去，係 Brave Little Tailor，唔知幾時先到我最愛嘅 Fantasia 魔法師造型呢？
今次入園玩，有散貨中嘅 星級款待 收藏品、新一套貼紙、新樂園指南、時間表，又一次收穫豐富！
沒有留言:
張貼留言