今日大約兩點入到去，樂園入面超多人！我都估唔估到會咁誇張。大部份遊樂設施都要排好耐隊，我只好行黎行去，等 米奇水花巡遊 開始。睇完巡遊之後，因為樂園入面又熱又多人，所以我都頂唔順，出返去比較靜嘅地方。響 迪士尼站 行去樂園門口，響噴水池要向右轉。但前面係仲有一條路通往兩間酒店。可能因為冇咩人行同埋唔太顯眼嘅關係，所以唔係太吸引到人注意。就算我一直都知道有呢條路嘅存在，咁耐以黎都未試過行... 而今日，我終於都試咗啦！
呢條路真係非常少人，所以格外清靜。沿途亦有不少佈置及園藝裝飾。
呢邊都有「歡迎蒞臨香港迪士尼樂園渡假區」呢個牌喎，不過就細好多。
呢邊啲燈柱旗幟，有好多都係平時響迪士尼站去樂園門口時見唔到嘅 迪士尼朋友！
仲有我鍾意嘅 小飛象 Dumbo 同埋 小飛俠 PeterPan 啊！
除咗可以去到渡假區嘅兩間酒店之外，呢條路亦可以去到 迪士尼碼頭。又係一直都知道佢嘅存在，但始終咁耐以黎都係冇黎過...
碼頭嘅入口有一個位置係用黎顯示船期表，不過個船期表係... 空嘅... =_=
碼頭分為東側同埋西側大堂，現時東側大堂係唔開放嘅，應該係因為流量太低。
響碼頭呢到亦已經可以見到 香港迪士尼樂園酒店 啦！
之後我沿住海濱長廊，行過去 香港迪士尼樂園 酒店。
響碼頭行過黎嘅距離好近，行兩分鐘就到。以前黎過酒店呢到食飯，但都已經係好幾年前啦...
酒店入面都裝修得好華麗，仲有一啲好靚嘅壁畫添！
但係，響酒店呢到，最能夠吸引我嘅並唔係壁畫，而係呢一樣野！
就係 香港迪士尼樂園 擴建模型！呢個模型有齊哂三個新園區！之前樂園入面嘅 動畫藝術廊 曾經改裝為 樂園擴建預覽中心，呢個模型亦放咗響嗰到。但前排再改裝返原本嘅 動畫藝術廊 之後，樂園入面就再見唔到呢個模型啦...
再一次能夠見到 灰熊山谷 嘅模型，感覺好特別。因為當你親身進入過園區入面之後，再睇返模型，自自然就會睇返兩者有咩差別。同埋，當你見到模型嘅時候，又會諗返現實嘅情境，整個過程好有趣。
下一次再比較現實同模型嘅時候，就輪到最後嘅 迷離莊園 啦！
之後我就行返返去樂園，入返去繼續玩。好幸運，終於都少返啲人。
轉眼間，到咗晚上啦！特別去咗睇下 迷離莊園 條通道；著哂燈，都幾靚喎！
上次試玩日，個天未黑哂就完咗。今次終於都可以嘗試響漆黑嘅晚上進行西部歷險！
無論係 灰熊山 定係西部小鎮，配合燈光嘅襯托，統統都變得更加迷人。
呢一晚，再一次響 幸運黃金石小食亭 用膳。呢個凱撒沙律都幾新鮮，會附上凱撒沙律醬同埋 米奇 頭型烤麵包，只係嫌盒醬太少啫...
另外亦叫咗一份炸雞粒薯條，啲雞粒太多粉，下次都係叫返炸魚塊啦。不過個汁就幾好味。
全日都好熱，所以要整返支消暑良品，西瓜汁！
食完野，我亦終於都有機會一嘗夜晚玩 灰熊山極速礦車 嘅滋味！
某啲路段佢特別冇加燈，咩都睇唔到，好過癮！
夜晚企返響呢個位睇礦車爆炸，啲燈光效果特別明顯！
最後，我決定響 灰熊山谷 入面睇煙花，黎結束今日響樂園入面嘅行程。但經實驗證明，灰熊山谷 係唔適合睇煙花嘅... 啲樹太高，遮住咗好多煙花，只係勉強睇到一啲放得特別高嘅煙花。同埋，響 灰熊山谷 入面睇煙花，冇咩感覺，始終兩者都唔啱主題嘛...
反而行返出 探險世界 木筏碼頭 位置，個景觀就開揚好多。丫，等我下次又試下響 反斗奇兵大本營 入面睇，唔知又會有咩感覺呢？
奇妙嘅一天咁樣就過去啦，之後就要面對殘酷嘅現實世界啦... 無論點都好，都響到祝願我自己同埋一班應屆文憑試考生，聽日能夠順順利利跨過呢一關，向著自己嘅理想繼續進發！
沒有留言:
張貼留言