深入幻險森林, 體驗勇敢傳說!

唔知大家睇咗 Brave 勇敢傳說之幻險森林 未呢？未嘅話就要快啦，因為已經唔係太多戲院仲做緊。我響星期四一朝早就去咗睇早場，睇完嘅感覺就係：好似冇其他 Pixar 嘅戲咁好睇。

雖然相比之下係劇情冇咁好睇，但講到畫功，當然係專業級數啦，話哂都係 Pixar 作品喎！就算劇情唔夠吸引，我都幾鍾意呢套戲嘅，因為佢罕有地用咗中古時代做背景。無論係城堡、森林，每一個場景嘅畫面都做得好細緻，促使我又買咗一本畫冊返黎...

入面又係有好多好靚嘅概念圖，記載咗整套電影嘅發展歷程；以下呢幅就係城堡嘅概念圖。

當然亦都有角色造型圖啦！如果你有睇到套戲嘅話，一定會記得 Merida公主 整爛條裙嗰幕！

仲有 Merida 嘅三胞胎弟弟，佢地變咗做三隻熊仔，好可愛！哈哈！

仲有我最鍾意睇嘅 ColorScript 故事草圖，將整個故事完整地呈現出黎。

其實我星期二嘅時候都買咗一本 Pixar 嘅畫冊，因為我真係好鍾意 Pixar 啲戲！

入面有齊哂 Pixar 25年黎全部電影、短片嘅故事草圖以及概念圖。不過就冇 Brave，太新啦！當中有我最愛嘅 Wall‧E  太空奇兵‧威E，之前都同大家分享過我鍾意呢套戲嘅原因。

響戲院睇 Brave 嘅時候，響電影正式開始前，有一條動畫短片，LaLuna；呢到都有故事草圖啊！

與其擔心自己剛剛開始儲徽章而需要用好多錢，我更擔心買畫冊呢個嗜好，因為每本都唔平！淨係今個暑假，我已經買咗四本畫冊，Toy Story 3、Epic Mickey、Brave、Pixar，仲有迪士尼大典！好彩，只不過係剛剛開始買畫冊，要買返之前出咗嗰啲；正常每年都只係會買一、兩本。不過無論點都好，既然係有興趣，又覺得值得嘅，就唔洗計咁盡啦！