Duffy零食系列 - 曲奇餅與棉花糖

今日朝早，當我諗緊今日可以同大家分享邊啲商品嘅時候，我突然醒起一樣野！就係醒起啲零食會過期架喎！我即刻去睇下啲過期日期...  之前分享過嘅 Pooh 檸蜜糖就下年先到期，至於我響 東京迪士尼海洋 就買咗兩樣零食。兩樣都係以 米奇和Duffy的春日巡航 做主題，分別係曲奇餅同埋棉花糖。

先講曲奇餅先，整個盒係用咗 Duffy 嘅形狀黎設計架！盒上亦有春日巡航活動標誌，以及一啲 Duffy、ShellieMay 嘅園藝擺設插圖。

我覺得呢隻響花叢間遊玩嘅 Duffy 好可愛啊！

至於啲曲奇餅，都係 Duffy 形狀架！搞到我唔捨得食啊！不過十月先過期，我仲有幾個月可以欣賞，哈哈！

而呢包棉花糖，今日發現過期日係... 7月24日... 即係已經過咗期...  我冒住「生命危險」，試咗一粒，覺得冇咩問題，所以即刻猛咁食，務求呢兩日可以清咗佢！

啲棉花糖個包裝有 Duffy 頭！士多啤梨味，好味道！我原本以為入面全部都係 Duffy 頭，但我今日發現佢寫住有兩隻味；所以我就倒哂入面啲棉花糖出黎睇，原來有啲 米奇 頭響底，係朱古力味。

我覺得自己到最後又會唔記得食盒曲奇餅，等我諗個辦法提醒自己響到期前食哂佢先...