迪士尼黑色世界2012 黑色力量在各個港鐵站繼續倍增!

話咁快又過咗一個星期啦！上星期響港鐵站發現嘅 迪士尼黑色世界2012 燈箱廣告又唔同咗樣！今次換上新海報，主要應該係為咗配合 黑色聯盟戰 正式開戰！因為響新海報可以搵到黑色印記！雖然我就冇得拎住部機搜集黑色印記，不過我都繼續呼籲大家努力，為自己嘅陣營作戰到底！

上星期一仲未訓醒嘅時候就出門口搭巴士返學，去到北角落車轉港鐵，事情就係發生響呢一刻...  當我個人仲係呆下呆下嘅時候，我突然見到一張好熟口面嘅圖片喎！咦？狼人！唔係掛，我唔會真係唔夠訓到有幻覺掛！仲要連幻覺都同 迪士尼黑色世界 有關？睇真啲，原來我眼前嘅真係 迪士尼黑色世界2012 嘅燈箱廣告喎！仲要係連續兩個燈箱！一邊就係殭屍黨嘅Angelababy，另一邊就係狼人族嗰個唔知邊個。( 哈哈，我真係唔記得... )我就係響北角站見到呢個燈箱廣告啦，咁唔知大家響其他車站見唔見到呢？歡迎您報料！ 

咁點解我當時會以為自己有幻覺呢？因為咁耐以黎，我都未見過樂園賣燈箱廣告...  呢個亦都係我心中其中一個諗咗好耐嘅疑問，點解樂園一直都唔響港鐵落廣告呢？實多人睇到啦！其實係可以見到，園方政策係針對內地同埋海外遊客，好多時都率先響海外公佈各活動內容；我相信，亦因為呢個政策，所以放響香港嘅資源都相對減少，未有大肆宣傳。

不過，樂園近期明顯加強咗對本地人嘅重視，特別係響 灰熊山谷 新園區開幕時嘅宣傳攻勢。黎到 迪士尼黑色世界 呢個每年都受到本地人歡迎嘅活動，樂園當然亦唔敢鬆懈。今日見到呢個燈箱廣告都算係當眼位置，就可以知道今次樂園係幾咁落本！搵黎Angelababy、推出 黑色聯盟戰 手機應用程式，再加上不同嘅廣告陣容，見到今次咁重視本地人，真係特別令人鼓舞！因為我一直都相信，吸引本地人先係致勝之道！

話哂本地香港人能夠鍾意幾時黎就黎，唔似外地遊客可能要幾年，甚至十年先黎一次。假如能夠將樂園獨有嘅吸引力感染俾香港人，自然會有更多本地人遊園；同時間，佢地亦有機會變成 奇妙處處通 會員，變成Fans，佢地所願意嘅消費金額亦會相對提高。咁可能我嘅諗法係有啲理想化，但係無論如何，我都希望未來可以有更多機會見到呢啲燈箱廣告！