迪士尼粉絲的終極盛會 - D23 Expo 2013!

今日想同大家分享一個叫做 D23 Expo 嘅活動，一個被譽為屬於 迪士尼 粉絲嘅終極盛會！假如你係一位 迪士尼 嘅超級粉絲的話，相信都有聽過呢個展覽會，已經知道係咩黎。但係如果你未聽過 D23 Expo 的話，請容許我今日好興致勃勃咁同你介紹呢個咁特別嘅活動！

響開始講展覽會之前，首先要介紹一下 D23；D23 其實係 迪士尼公司 響美國成立嘅官方粉絲會。加入咗之後，每一季都會收到一本叫 Disney Twenty-Three 嘅雜誌，入面有 迪士尼 嘅最新資訊；同時，會員可以有不同額外優惠，亦可以參加不同活動，而 D23 Expo 展覽會就係最大型嘅一個。要注意，D23 唔同 奇妙處處通，香港呢邊只係將 全年通行証 改做「會員」呢個好聽啲嘅名；事實上，D23 並唔係只係針對樂園，佢地會留意關於 迪士尼 嘅更多範疇，包括電影、電視等。

講返 D23 Expo 展覽會先，響展覽會入面劃分咗好幾個展館，會展出好多不同類型嘅展品。關於即將發佈嘅電影、商品都會有，但最吸引人嘅，相信就係由 迪士尼幻想工程 所展出嘅展品！因為佢地會講到全球各個 迪士尼渡假區 嘅最新發展！連 香港迪士尼樂園 都有機會有份架！另一方面，呢個展覽會亦都提供一個好好嘅機會俾全球嘅 迪士尼 粉絲交流一下，真係好有意義！

2009年舉行咗第一次嘅 D23 Expo，之後隔年舉行，下年2013年都會有，通常會係響8月嘅。正常來講，每次展覽會為期三日，除咗展覽廳，期間仲會有好多講座，講述不同嘅 迪士尼 主題。展覽會響加洲舉行，咁即係話，遲啲我去加州嗰陣，可能都有機會可以去睇下！係嘅話就好啦！

講起粉絲會，日本嗰邊都有官方成立嘅粉絲會，不過佢地就比較專注響 東京 嘅兩個主題公園。入會都係每季會有雜誌，之後仲可以參加園方所舉辦嘅特別活動，但規模應該就不及 D23 啦...

又係時候講下一啲自己心中嘅感想：好老實講，我地香港呢邊好似真係冇咩重視過粉絲呢一樣野。相反，園方只係會著重一啲能夠令自己賺錢嘅媒體；冇計，香港就係一個咁現實嘅地方...  有時候真係見到都心痛，一啲佢認為有價值嘅媒體 ( 係唔係真係有價值，我唔評論 )，就大派禮物；我地一班一直支持嘅粉絲，響 灰熊山谷 開幕前去試玩，一份禮物都冇，慘啲嘅話甚至試玩都冇份。好老實講，我唔係真係在乎嗰一兩份禮物，而係園方俾我嘅感覺，佢根本唔珍惜我地呢班 Fans。

由 全年通行証，去到現今嘅 奇妙處處通，可以感受到園方針對呢批賓客嘅政策係愈黎愈求其。但我亦都知道，響 奇妙處處通 當中，亦有人以為掛住一個所謂「會員」嘅名銜就會得到尊貴待遇；我試過去 奇妙處處通會員中心 拎禮物，見到有一位女士同佢嘅一家人剛剛升級咗做 奇妙處處通；演藝人員就俾咗幾條頸繩佢，佢想要膠袋裝起哂，但因為會員中心入面冇，嗰位演藝人員就答返，「唔好意思，我地冇，可能要問出面商店嘅同事攞」「吓？！即係要我去拎啊？」大聲夾惡咁講。可能就係呢班咁「尊貴」嘅「會員」，令到園方都無能為力，唔能夠進一步去延伸會員計劃。

其實我只係好希望，我地香港都可以好似人地咁，粉絲之間可以有一定嘅互動性，更加溫馨。響之前9月12日 香港迪士尼樂園 七週年嗰日，我突然非常能夠體會到粉絲、演藝人員之間嘅溫馨；特別係正門嘅演藝人員響放緊煙花期間，都繼續守候，唔知會唔會有粉絲響最後一刻趕到...  要響9月12日之外嘅日子延續呢份溫馨，可以有好多種方法，可以有好多種途徑，但我只可以講：搞個評審準則係咩都唔知嘅短文比賽，加個有啲唔關事嘅人出現嘅冒險派對，絕對唔係方法之一。或者，一個FansClub嘅成立，正正就係從「專貴會員」入面區分默默支持嘅Fans嘅最佳方法...