每個人嘅生命之中，都會有一個又一個嘅故事，而童年嘅故事往往都會係最有趣嘅... 假如永遠都可以保持童真，用純真嘅角度黎睇呢個世界，過每一日，相信一定會好美好... 點解我會成日都仲自稱做「男孩」、「小朋友」，好似大唔透呢？我諗呢個就係最大嘅意因啦。
今日就想同大家分享一個關於我童年嘅故事，而呢故事，去到今時今日都繼續延續緊。其實我都幾鍾意砌積木，能夠親自將一啲得意嘅野整出黎，個感覺好特別；亦因為呢樣嗜好，令我慢慢培養到今日嘅性格，故事、相片、圖畫，全部都係親自創作出黎。而呢種性格，更加令我發展了另一個夢想，就係要成為一位 迪士尼幻想工程師。
講起積木，相信最熟悉嘅品牌，就係 LEGO 啦。LEGO 響我心目中，都佔咗一個幾重要嘅席位。( NanoBlock 都開始興起，不過經歷過上次單野之後，我有啲怕怕... 都係LEGO好玩啲！哈哈！) 當人慢慢長大嘅時候，好容易就會扔棄一啲舊嘅玩具；就算唔捨得，都因為間房冇位而放棄。不過，有一樣玩具，我由小學嘅時候開始玩，去到呢一刻我都仲未扔，仲不時會拎出黎玩！
呢樣玩具就係一架 LEGO 飛機啦！睇開呢個Blog的話可能會知道，我對「飛」係有一種響往。我覺得能夠自由自在咁飛行係一件好暢快嘅事，所以自然對飛機都有啲興趣。而呢架LEGO飛機，結合咗積木同埋飛機呢兩種元素，就令佢成為咗我的最愛！
點解我今日會突然寫呢篇文章呢？其實我本身係想同 Duffy 佢地訓晏覺嘅，但係訓唔著。突然心血來潮，就拎返呢件玩具出黎砌；之後再心血來潮，想同大家分享下我同 LEGO 嘅故事。
LEGO 啲人仔叫 Minifigures，都幾得意架！呢架飛機，當然唔少得機師同埋空中服務員啦！
仲有飛機維修員，佢地好專業好認真架，要確保飛行安全嘛！睇下佢地啲工具幾強大！
最後有機場工作人員，響機場入面為你服務！響你上機前，更會同你講聲：「旅途愉快！」
我玩LEGO應該已經超咗齡，佢地啲產品最大好似都係俾14歲，但我而家都仲想買返盒返黎砌！我都唔明，咁好玩嘅野，其實同年齡有咩關係呢？我覺得呢個世界唔會得我一個大細路囉！XD
之前上網睇過，有啲產品都好吸引！有啲太空系列，有穿梭機，又有火箭發射中心！
仲有一個新嘅系列，係同恐怖事物有關，其中一個我特別有興趣嘅係呢個殭屍古堡！
LEGO 咁得意，所以預定響下年去美國加洲時，除咗去 迪士尼渡假區 之外，要去埋 LEGOLAND！到時全個畫面都係 LEGO，我一定會好興奮！不過我最期待嘅係呢間可以自由揀LEGO積木商店！我記得每年動漫節 LEGO 都會參展，都可以自由揀積木，但係一定冇 LEGOLAND 咁多款掛！
到時等我揀多啲顏色，買返黎砌下啲自創嘅野先！次次都係跟住教學冊，唔知自創會係點嘅呢？不過LEGO惟一唔好嘅地方，就係唔平，呢間商店啲積木每四份一磅賣9.99美元 ( 約78港幣)。好啦，我又時候儲下錢，如果唔係，到時又去 迪士尼，又去 LEGOLAND，實唔夠錢啦！我仲有半年時間，我要買少啲野慳返啲！唉... 但係我一定會好容易又會俾樂園啲野引誘到... >_<
沒有留言:
張貼留言