上星期分享過，響活動開始前，園方都陸續響 美國小鎮大街 增添金光閃閃嘅農曆新年佈置；黎到活動開始嘅呢一日，出現咗更多新年裝飾，包括擺放於樂園中心樞紐位置嘅桃樹、桔子！
小鎮廣場 以及大街兩旁嘅建築物都完成最後佈置，以完美嘅農曆新年面貌展現於賓客嘅眼前。整個樂園只有 美國小鎮大街 加上新年裝飾，的確有啲遺憾，幸好街上嘅氣氛都算係唔錯...
除咗戶外，商店內擺放農曆新年系列產品嘅位置都有特別佈置，米奇金光巨石 圖案再次出現！
商品櫥窗同時都搖身一變，變得充滿農曆新年氣息！米奇家族 各個成員亦響櫥窗內同大家見面！
唔想隔住玻璃窗同佢地見面？想親身同佢地拜年、影相？冇問題！佢地經已換好新裝等緊你！
Duffy迪士尼小熊 都有份架！佢套服飾就唔係新嘅，不過可以同大家一齊過年，佢都好開心啊！
動畫藝術教室 近期都多咗不同嘅 迪士尼朋友可以畫，前嗰排我都分別畫過 高飛、布魯托！今次黎到 金年有福 活動，就有戴上中國帽嘅 米奇、唐老鴨！有興趣嘅話都可以去畫下。
配合活動開始，園方都印刷新一期樂園指南；不過封面就比較求其，只係用返商品嗰張圖片...
反而貼紙就有啲驚喜！閃閃發光，整得好靚啊！金年有褔 活動一共派發七款貼紙，比平常少...唔知今次係唔係重質不重量呢？除咗 美國小鎮大街 同時派發兩款之外，每個園區都會派發一款。
活動開始後，奇妙處處通 會員將會有兩項專享禮遇！其中一樣就係園方再次推出會員獨家徽章！今次推出嘅並唔係徽章套裝，而係獨立一個珍寶徽章，所以價錢上相對比聖誕嗰次便宜少少。
今次都係限量300個，購買徽章同時附送一個小福袋，亦印有「奇妙處處通 專享」嘅字樣。
樂園呢排都針對會員推出獨家商品，希望園方響未來可以更加珍惜一班默默支持樂園嘅Fans啦...
另一項專享禮遇就係可以響 金年有福 活動期間響 奇妙處處通 會員服務中心 換領紙雕揮春！
呢個揮春係一個「福」黎嘅，仔細睇真啲，上面隱藏著各個 迪士尼朋友！大家記得去拎啦！
最後，為大家送上幾張 米奇金光巨石 嘅夜間相片！裝飾配合燈光效果，往往都係更有魅力嘅！
一個冇表演、有名無實嘅活動，唔知又吸唔吸引到你入園玩呢？不過入去影下相都唔錯嘅！響充滿中國色彩嘅 美國小鎮大街 望下周圍嘅佈置，與一眾 迪士尼朋友 渡過奇妙嘅一天吧！
沒有留言:
張貼留言