今年暑假，樂園為配合《怪獸大學》上映，特別用咗怪獸黎做夏日活動嘅主題；而園內都推出咗好多得意嘅怪獸商品，除咗不同角色嘅毛公仔之外，仲有好多趣緻嘅玩具！
反斗奇兵大本營 安仔玩具箱 都被怪獸入侵呢！有好幾個貨架都換上怪獸主題！電影入面嘅兩位主角：毛毛 以及 大眼仔，更加擁有自己嘅專屬貨架，全部都係佢地嘅精品！
好多人都鍾意 毛毛 同埋 大眼仔，至於我就有一位怪獸新寵兒：向左和向右！丫... 唔係一位，應該係一對先啱！雖然佢地連住咗一齊，但的確係兩個獨立嘅個體黎嘛，哈哈！
買咗好幾樣商品，其中一樣就係 向左和向右 毛公仔，整得都同電影入面幾相似！不如等我趁住呢個機會，詳細咁介紹一下佢地，令大家可以對佢地有更深入嘅認識啦！
以佢地嘅角度黎講，左邊嘅係 向左Terry，佢高一啲、擁有兩隻角、係哥哥、主修英文；另一邊，右邊嘅係 向右Terri，矮一啲、只得一隻角、係細佬、主修舞蹈。
佢地兩位都一齊加入咗會社 啱Key會，然而，佢地兩個事實上並唔係好啱Key... 向左 比較文靜，向右 比較活潑，性格唔算好夾，但無奈地被困住響同一個身體，都幾搞笑！
接著落黎就講下佢地嘅身體構造啦！佢地總共有四隻手，佢地各自可以控制自己嗰邊嘅兩隻手！咁大家又估唔估到 向左和向右 有幾多隻腳呢？答案就響以下嘅相片裡面！
我另外仲買咗一個鎖匙扣，係由 向左和向右 嘅兩個頭組成嘅，係唔係好好搞鬼呢？不過呢個鎖匙扣就冇咩特徽，所以我就唔講咁多了。
反而我買嘅另一個玩具就值得我講多啲！就係 向左和向右 轉轉驚嚇球！仲有其他款式架！當然唔少得 毛毛、大眼仔，亦有 阿拱、淋支支 等新角色，一共有八款。
拆開包裝，裡面有一個 向左和向右 轉轉驚嚇球，同埋一張類似怪獸學生證嘅硬卡。但係點解叫做轉轉驚嚇球呢？究竟有咩咁驚嚇呢？請繼續睇落去，嘿嘿！
首先，幫忙為 向左和向右 收埋兩個頭同埋一對手先，令佢地變成一個完整嘅球體。之後就將轉轉球碌過去卡紙上面，當碌到去嘅時候，佢地就會突然彈返出黎，嚇你一跳！
我覺得轉轉驚嚇球都算係幾過癮！而我最後都仲有一樣好得意嘅商品要向大家特別推介！呢堆一包包嘅野，每一包都裝住一隻迷你怪獸；假如想要某隻怪獸的話，就要睇下好唔好運啦！
最有趣嘅，就係購買之前可以隔住包裝，摸下裡面嘅怪獸，憑著形狀去估計佢係邊個！我就想要 向左和向右 同埋 大眼仔，摸咗一大輪，我覺得呢兩包就係我想要嘅兩隻怪獸仔！
重要嘅一刻要來臨啦！好緊張啊！究竟係唔係我想要嘅 向左和向右、大眼仔 呢？好耶！成功獲得 向左和向右 迷你怪獸仔！佢地有兩個頭，所以係易摸啲嘅！
可惜另一包我就摸錯咗... 我以為係 大眼仔，但原來係 至嚇會 其中一位成員，但我唔知佢個名... 結論：除咗要摸得好仔細之餘，都需要少少運氣，先至可以得到心頭好！
同時都想響到作出特別呼籲，當日我響店內研究呢啲迷你怪獸嘅時候，竟然發現有一包俾人開咗... 相信各位都係怪獸Fans先至咁想要一隻心愛嘅迷你怪獸，但都希望可以尊重他人，唔好拆開包裝...
言歸正傳，呢包迷你怪獸仔裡面，亦有附送一張角色目錄，以及一張對應嘅角色貼紙！向左和向右 嘅貼紙好靚！我會好好收藏佢！唔知樂園下一期貼紙又會唔會有佢地兩個呢？
假如以上咁多款商品都未能吸引你的話，都唔緊要，仲有一份唔需要錢就可以獲得嘅禮物！由即日起至8月11日，奇妙處處通 會員可以去到 會員服務中心 換領呢份怪獸小禮物！
小禮物其實係一卷彩色膠紙黎嘅，園方稱為《怪獸大學》優「獸」隨處貼。膠紙上面有眾多怪獸角色之餘，仲有樂園標誌、奇妢處處通 標誌、怪獸大學 標誌。
今次呢個小禮物有齊咁多位 啱Key會 嘅成員，無論你鍾意邊個都好，相信都能夠滿足到你！我自己就非常滿足啦！因為有 向左和向右！我呢排真係超鍾意佢地！
又有同場加映：怪獸大學行政大樓 入夜後配合燈光效果嘅情境。平時響日間經過行政大樓，都見到好長嘅人龍；黎到夜晚，冇哂人，完全係另一種感覺...
樂園近期都推出咗好多全新嘅商品系列，當中比較矚目嘅就係 八週年主題商品。距離樂園嘅八歲生日都仲有一段時間，所以我打算遲少少先買，到時再同大家分享我有咩收穫啦！
話時話，講起怪獸，大家發唔發現到早幾日我響旁邊嘅 怪獸大學 專題欄目作出咗更新呢？每次入黎 Tho's Dreams 都會見到唔同嘅怪獸現身架！唔知你又見到邊隻怪獸出黎同你打招呼呢？
沒有留言:
張貼留言