迪士尼雪亮聖誕2013 就黎開始咗兩個星期，大家入咗樂園體驗未呢？今年嘅活動項目大部份都同之前差唔多，都係 聖誕小鎮、迪士尼朋友 聖誕新裝、大街閃雪亮燈 等等。但同時，園方今次特別響 反斗奇兵大本營、灰熊山谷、迷離莊園 新增咗三個小型劇場，吸引咗唔少人嘅注意！咁究竟呢三個劇場嘅表演係點嘅呢？而家就同大家去睇下啦！
我地首先黎到位於 反斗奇兵大本營 裡面嘅 安仔劇場！一班玩具出咗嚟，呈獻 反斗玩偶劇場！呢班玩具準備咗三個小故事，分別由 胡迪、翠絲、巴斯光年 擔當故事主角！佢地詢問觀眾，究竟想聽邊個故事，決定好之後就隨即設置佈景，預備開始講故事！
不過響開始講故事之前，佢地仲需要一啲小幫手；佢地邀請幾位小朋友上去舞台幫忙，而每位小朋友都會有一位玩具朋友在旁協助！
要開始講故事啦！安仔 好認真咁為每個故事繪畫咗獨特嘅主題佈景，例如：巴斯光年 故事嘅佈景係顯示太空行星。而故事內容亦都係環繞著主角發展嘅。除咗故事主角之外，其他來自《反斗奇兵》電影系列嘅玩具角色都會一一登場，一齊為大家演繹得意搞鬼嘅反斗故事！
講完故事，向觀眾謝幕先！其實每次演出就唔算好耐，只係大約八分鐘左右，但相信在場嘅小朋友響呢短短幾分鐘一定睇得好開心！
下一個劇場就係 迷離莊園 亨利爵士皮影劇場！唔知爵士為我地帶嚟咗點樣嘅演出呢？由於響光猛嘅環境底下睇皮影戲會睇得唔清楚，所以呢到嘅演出都係響傍晚或者入夜後進行。演出開始前，已經有好多莊園訪客坐咗響座位上面等待！
亨利爵士 嘅子侄出黎同大家打招呼，幾句開場白之後，皮影劇團就開始表演啦！準備好大開奇幻眼界未呢？
呢個皮影戲故事係講述 亨利爵士、阿拔 周遊列國嘅經歷，故事共分三幕，分別係發生響 意大利、埃及、中國 呢三個國家。情節突顯咗 阿拔 調皮嘅性格，同時亦有提及 亨利爵士 搜集珍藏品嘅經過。
演出完畢後，子侄邀請皮影劇團去到幕前同大家見面，佢地都拎住啲皮影道具出嚟俾大家見識一下。我自己係好欣賞園方引入皮影戲演出嘅，不單止配合到 迷離莊園 嘅主題，亦可以俾我地認識一下呢個傳統中國藝術。可惜嘅係，故事內容略嫌沉悶...
最後一個劇場位於 灰熊山谷，一個布偶劇團響聖誕節期間黎到大福小鎮同大家分享有關灰熊嘅小故事！團長表示，呢個小故事係由木匠先生同佢講嘅，而木匠先生亦都響演出期間在場奏出配樂！
灰熊手偶劇場 所上演嘅故事名為「Winter Wish 冬日願望」，開始嘅時候，團長亮起掛響馬車上面嘅聖誕星星，係唔係好靚呢？
熊媽媽、熊寶寶 出場啦！臨近聖誕節，寶寶不斷哀求媽媽，希望可以有一棵聖誕樹陪佢渡過呢個歡樂嘅節日；但媽媽就唔知道可以響邊到搵一棵聖誕樹俾佢嘅寶寶，同時亦擔心佢地會遲咗去冬眠... 熊寶寶 嘅冬日願望會唔會成真呢？
原來 熊寶寶 都有幾多朋友仔架喎！藍鳥、松鼠、響尾蛇 合力為寶寶尋覓聖誕樹所需要嘅佩件，多得一眾動物朋友幫手，寶寶嘅願望慢慢得以實現啦！
但講到最矚目嘅動物朋友，必然就係 幸運狗 Lucky！呢隻狗仔響 灰熊山谷 開幕嘅時候早就已經係園區背景故事嘅一部份，今次嘅聖誕劇場，園方就進一步描述關於佢嘅事跡。Lucky 幫寶寶搵咗兩舊金塊，掛響聖誕樹上面作為裝飾！
終於，屬於 熊寶寶 嘅聖誕樹大功告成啦！雖然呢棵樹同平時嘅聖誕樹有好大分別，但對於 熊寶寶 黎講，佢係獨一無二嘅，盛載著重大嘅意義！就響聖誕樹完成嘅呢一刻，灰熊山谷 竟然落雪啊！響咁幻麗嘅情景下，呢個故事亦都黎到尾聲，劇團團員拎住布偶向觀眾謝幕。
之前我話過，覺得 灰熊山谷 嘅聖誕裝飾比較普通，效果一般；但係又估唔到，呢到嘅布偶劇場係三個劇場之中最精彩嘅！不論你鍾唔鍾意布偶公仔，都可以去睇下，或者會有一種意想不到嘅感覺架！
今年嘅聖誕活動取消咗我稱為小型巡遊嘅 米奇玩具舞曲，取而代之嘅就係呢三個全新嘅劇場演出。我會話係有好有唔好啦，好嘅係聖誕項目唔再只係局限於 美國小鎮大街，唔好嘅係呢三個劇場嘅聖誕氣氛遠遠不及 米奇玩具舞曲。如果有得俾你揀，你會寧願要邊一個安排呢？
I really like the paper puppet show:) Oh,I haven't listened the ''Winter Wish''>< ><
回覆刪除