精緻的漁村小店, 齊來探訪 Duffy迪士尼小熊!

響 Cape Cod 碼頭落船之後，我當然又響呢個「Duffy基地」逗留多一陣，話哂 Duffy迪士尼小熊 係我最愛嘛！今次我去咗 Aunt Peg's Village Store 漁村小店掃貨，呢棟紅色嘅建築物就係我要去嘅商店啦，裡面有好多 Duffy迪士尼小熊 嘅相關產品架！

由正門行入去，即時有一眾 Duffy、ShellieMay 歡迎我！配合 米奇和Duffy的春日巡航 活動，店內都多咗好多春日佈置，有花環、盆栽、旗幟等。

放響正門嘅係 超級巨大Duffy、超級巨大ShellieMay！你地好嗎？我地又見面啦！另外亦有兩隻 Duffy、ShellieMay小熊 穿著黃金服飾，慶祝 東京迪士尼渡假區 三十週年！

我成日都有衝動想買一隻 超級巨大Duffy 返屋企，但係佢嘅售價實在係太貴...  同埋，就算買得起，要將佢運返香港應該都會係一項頗為艱巨嘅工程！

作為 Duffy迪士尼小熊 專門店，店內嘅貨架放滿小熊毛公仔、小熊鎖匙扣、小熊飾物！場面咁虛撼，相信任何一位 Duffy 粉絲黎到呢到都會感到特別興奮！

剛才響正門見到兩隻小熊著咗黃金服飾，意味著店內都有唔少 三十週年慶典 幸福歡樂年 嘅主題商品！全部都金光閃閃，我又點會忍到手呢？

仲有唔少得嘅係春日巡航活動商品！兩個節慶活動同時舉行，推出多咗好多商品，今次大出血啦！咁究竟我最後買咗幾多野？稍後再同大家分享各樣我買咗返黎嘅商品！

或者你會問，晨早流流就去掃貨，咁咪全日都要拎住啲野囉？同我地香港呢邊一樣，東京迪士尼渡假區 提供一個非常貼心嘅服務，可以幫 迪士尼酒店 嘅住客將買咗嘅野直接送去酒店大堂，等佢地返去酒店嘅時候先至提取商品！於是，我就選擇將商品送去我當晚入住嘅 東京迪士尼樂園酒店，咁就唔洗拎住一大袋野周圍玩啦！