先後分享咗 東京迪士尼樂園 Dreamlights夢之光 眾多花車之中公主、仙子、彼思 嘅部分，最後一篇夜間巡遊專題文章，經典 迪士尼朋友 大集合！米奇 已經準備好，連同佢嘅一班朋友們響黑夜間綻放光茫！你又準備好見證星光閃耀嘅一刻未呢？我地開始啦！
花車12：由 高飛 擔當控制員，Casey Jr. 火車一路噴住蒸氣，一路向前！
米奇、米妮 企響後面嘅車卡，「Dreamlights」字樣響車身閃爍！
花車13：接著落黎就係一系列 迪士尼 經典動畫主題花車，首先係《愛麗絲夢遊仙境》。
突然，妙妙貓 響神不知鬼不覺間消失咗，就連 愛麗絲 都感到非常神奇！
進入仙境，不同嘅小昆蟲、花兒全部出動，為黑夜帶來色彩！
花車14：龐大嘅恐龍登場啦！恐龍 Elliott 帶著氣勢出場，更加不時噴出白煙！
小男孩 Pete 坐響 Elliott 嘅頸上，提醒佢要做一條乖乖嘅恐龍！
花車15：Here we go！跟住 小飛俠 翱翔天際，向夢幻島出發！
鐵勾船長、史密先生 都響海盜船上面，小飛俠，靠你對付佢地啦！
花車16：維尼 捉緊汽球，再次想接近樹上嘅蜂巢，跳跳虎、伊唷 都冇佢辦法...
大樹後面，幾隻小蜜蜂響到盤旋，唔通佢地係黎守護自己嘅蜜糖？
花車17：巡遊進入尾聲，巡遊路線響起《小小世界》旋律，最後幾架花車壓軸出場！
唐老鴨 響蒸汽船造型花車上面，仍舊活潑調皮！
三隻小豬 亦都現身，手握彩帶，隨著節奏歡呼。
花車18：鋼牙奇奇、大鼻帝帝 登上飛船，響夢幻嘅夜空中飛翔！
花車19：星月薈萃，史迪仔、妮露 踏上小船，邀請大家共同仰望天際。
月亮下、星光下，Jiminy、Pinocchio、Gepetto 創造出夢幻嘅景象。
花車20：太陽對住所有人微笑，Panchito Pistoles、Jose Carioca 幫忙帶動現場氣氛！
Marie、Pluto 同大家揮手講再見，整個夜間巡遊完美結束！
東京迪士尼樂園 嘅巡遊表演有一個較為特別之處，就係巡遊隊伍最尾會有一架小型花車，展示贊助商名字。講起小型花車，其實整個夜間巡遊都有好多小型花車，但我數嘅時候只係計大型花車，所以實際花車數目係唔止二十架，呢個巡遊嘅規模真係好大！
另外值得一提嘅係：服裝！唔知大家留唔留意到，大部份 迪士尼朋友、巡遊演出者嘅服裝都有燈光效果，幻麗嘅花車再加上呢啲額外嘅燈光元素，整個觀感又再提升到另一個層次！我亦覺得好多表演者嘅服飾係設計得好有心思，可惜真係好難影得靚同埋影得哂，下次要再接再厲！
Dreamlights夢之光 強勁嘅陣容，再加上稀有 迪士尼朋友 嘅出場，令整個巡遊嘅吸引力大增！我會話係 東京迪士尼樂園 絕對唔可以錯過嘅項目！唔知香港呢邊即將呈獻嘅夜間巡遊又會係點嘅呢？或者陣容唔會咁強大，但我相信，呢個新巡遊同樣會為 香港迪士尼樂園 增添色彩！
沒有留言:
張貼留言