東京迪士尼渡假區 三十週年慶典完滿落幕後，幸福歡樂並未就此完結，今個春季，佢地再有新項目登場！2014年5月29日，全新城堡投影表演 Once Upon A Time 進行首演，成為 東京迪士尼樂園 每晚例行公演嘅新節目！
以下係 Once Upon A Time 嘅官方圖片，可以見到呢個表演會有多位 迪士尼朋友 現身！包括《美女與野獸》、《愛麗絲夢遊仙境》、《灰姑娘》等等嘅動畫角色。
咁究竟咩叫城堡投影表演呢？其實就即係運用投影機，將影像投射到城堡嘅表面上，城堡就好似變成一個電影螢幕咁，將一幕又一幕嘅故事呈現出黎。
而除咗城堡表面嘅影像之外，整個表演期間亦會加入煙火效果，再配合埋不同顏色嘅燈光，令到整個畫面變得更加豐富壯麗！
剛才就提及到，欣賞呢個表演會見到好多經典嘅 迪士尼朋友；但講到最令我開心嘅，必然就係會有 小飛俠 登場！可以跟隨佢飛越夢幻島，一定會係非常奇妙！
Once Upon A Time 亦有一個額外驚喜，就係先前風靡全球嘅《魔雪奇緣》迪士尼朋友 都有份出場啊！Elsa 將會施展魔法，令到 灰姑娘城堡 化身成為屬於佢嘅冰雪城堡！
東京迪士尼渡假區 每逢有新活動或者新項目登場，都會推出一系列嘅主題商品，當然今次都唔會例外！Once Upon A Time 呢個表演以童話故事為主題，所以相關商品都設計成童話書嘅模樣！
其中一個令我非常有興趣嘅商品，係以下呢個 nanoblock 發光城堡！先用積木將 灰姑娘城堡 砌出黎，之後再放上燈座，燈光滲入到城堡之中，係一件非常幻麗嘅小擺設！
丫，講起發光，之前 東京迪士尼樂園 都推出左一個發光嘅道具飾物！呢支 米奇魔術棒，可以發出不同嘅燈光，究竟有咩特別用途呢？
呢樣新商品，可以響 東京迪士尼樂園電子巡遊：夢之光 進行緊嘅時候跟隨花車變換色彩！例如，當綠色嘅 Pete 恐龍花車經過嘅時候，呢支魔術棒就會發出綠色嘅燈光！
之後當 灰姑娘 花車黎到嘅時候，魔術棒又會變成紫藍色！一路拎住呢支 米奇魔術棒 欣賞夜間巡遊，唔單止靚咁簡單，相信必然會更加投入其中！
嘩嘩嘩，數一數 東京迪士尼樂園 現有嘅夜間項目先！首先係夜間巡遊，然後有煙花表演，最後係最新加入嘅 Once Upon A Time！咁多表演，去到嘅時候一定會好忙啦！東京迪士尼之旅2014，盡情感受 東京迪士尼樂園 非一般嘅晚上！
沒有留言:
張貼留言