東京迪士尼之旅2014: 踏進復活節秘密花園

每次講起 復活節 呢個節日，都會俾到我一種充滿活力嘅感覺，呢種認知應該係黎自 東京迪士尼之旅2012，參加過 東京迪士尼樂園 嘅復活節活動之後所留低嘅！欣賞愉悅嘅巡遊，響園內尋覓復活蛋，林林種種嘅特別項目，真係令我玩得好開心！

2013年，東京迪士尼樂園 因為舉行三十週年慶典，所以冇舉行到復活節活動；雖然覺得有啲可惜，不過都慶幸整個旅程依然係滿佈幸福歡樂！2014年，三十週年慶典完滿結束，「迪士尼復活節」活動終於響 東京迪士尼樂園 載譽歸來！

2012年嘅時候，當時佢地嘅復活節活動稱為「迪士尼復活節奇幻世界」，今年嘅活動名稱改為「迪士尼復活節」；意味著，活動主題同之前一樣，不過各個活動項目就會係全新嘅！

而當中最矚目嘅，就係全新嘅復活節巡遊，Hippity Hoppity Springtime！我覺得 東京迪士尼樂園 真係好厲害，每個節日都有獨立嘅主題巡遊，仲要每隔幾年就會作出更新！今次呢個全新嘅復活節巡遊，一共有七架花車，故事講述一眾 迪士尼朋友 帶領我地踏進復活節秘密花園！

花車1： Thumper、Miss Bunny

花車2： Br'er Rabbit、Chip、Dale

花車3： Goofy、Max、White Rabbit

花車4： Mickey、Pluto

花車5： Huey、Dewey、Louie、Rabbit

花車6： Donald，Daisy

花車7： Minnie、Clarice、Marie

有新巡遊，當然都有新歌啦，以下就係 Hippity Hoppity Springtime 嘅完整音樂聲帶！活潑嘅旋律，一聽就令人好想蹦蹦跳跳，我聽咗幾次就已經上咗腦啦，哈哈！

  

而除咗巡遊，「迪士尼復活節」都仲有好多值得留意嘅項目，其中一個我覺得係萬物錯過嘅係：城堡廣場 嘅節日裝飾！米奇、米妮 等 迪士尼朋友，再加上有好多可愛嘅兔仔出沒！

東京迪士尼渡假區 所製作嘅塑像一向都係好靚好大規模，色彩繽紛之餘仲要整得非常細緻，花朵、蘑菇、復活蛋...  所有都復活節有關嘅題材統統都可以搵得到！

唔單止正中心嘅花圃有一個超巨型裝飾，就連左右兩旁嘅花圃都有額外裝飾！唐老鴨 有豐富嘅田園收穫喎，有一隻兔仔同佢一齊想將紅蘿蔔拔出黎，唔知佢地最後會唔會成功呢？

另一重點項目就係 尋找復活蛋遊戲！響「迪士尼復活節」期間，整個樂園裡面都會放滿不同迪士尼朋友 嘅造型復活蛋，散落於各個主題園區，要搵哂真係一啲都唔容易！

Chip、Dale 造型復活蛋

Goofy 造型復活蛋

Henry、Teddi Barra 造型復活蛋

樂園方面特別為各位復活蛋專家推出 復活蛋遊戲套裝，購買套裝後，只要成功搵齊遊戲指南上面所指明嘅 迪士尼朋友 造型復活蛋，就可以隨機獲得一款復活蛋紀念品！

假如有信心可以將園內最難搵到嘅復活蛋都搵到出黎的話，就可以試試進階版遊戲！其實我玩尋寶遊戲一直都好差，但係我決定到時都要玩下！希望我會成功將吊飾紀念品拎到手啦！

除咗以上提及到嘅活動項目之外，「迪士尼復活節」另外亦有主題商品、節日食品等等...  我相信今次會響 東京迪士尼樂園 感受到一個最開心嘅復活節！我已經準備好踏進復活節花園，將內裡嘅秘密全部發掘出黎！