帶大家去到 東京迪士尼海洋 地中海港灣 園區，呢到有一個角落以威尼斯運河作為主題。
2014年6月上旬，呢到發生咗一件神秘嘅事情... 有一幅 Duffy迪士尼小熊 壁畫突然出現！
Duffy 拎住咗一杯意式雪糕，佢睇起黎好開心喎！但係... 呢幅壁畫究竟有咩含意呢？
之後，旁邊嘅牆上又有另一幅壁畫嘅草稿出現咗！令到整件事顯得更加神秘！
而呢個地區嘅周圍亦都出現咗好多壁畫，全部都好靚，究竟係邊個畫嘅呢？
除咗壁畫，另外亦有一幅油畫顯示 Duffy 響威尼斯運河乘坐貢多拉船。
咦，有一塊 米奇頭形顏料板！係屬於邊個嘅呢？旁邊仲有一啲小腳印！
驟眼睇，或者你會覺得呢啲腳印係 Duffy迪士尼小熊 所留低嘅，但睇真啲之後，就可以發現其實呢啲腳印並非屬於 Duffy。雖然睇起上黎非常相似，但係 Duffy 嘅腳板，米奇頭形圖案 上面係有四個圓點嘅，不過呢啲腳印就只得三個圓點...
咁點先可以解開一切謎團？壁畫出現後，東京迪士尼渡假區 官方網站新增咗一個專題頁面。
專題頁面不時會刊登一啲線索，亦會更新壁畫嘅最新進度；慢慢，一隻貓兒嘅身影出現了！
最後，去到2014年6月30日，東京迪士尼海洋 終於都舉行發佈會，公佈全新角色 Gelatoni 正式登場！ 嗯... 點解呢隻可愛嘅貓貓會叫做 Gelatoni 呢？令我諗起意式雪糕(Gelato)... Duffy 響嗰幅壁畫上面亦係拎住一杯意式雪糕... 莫非有咩玄機？
好啦，就等我地打開故事書，一齊認識呢位 Duffy迪士尼小熊 嘅新朋友啦！或者會搵到答案！
有一日，Duffy迪士尼小熊 跟隨 米奇 散步，但係佢唔小心將自己嘅意式雪糕跌咗落地...
就響呢個時候，Gelatoni 出現了，佢向 Duffy 講：「冇問題！等我黎啦！」
Gelatoni 將地上嘅意式雪糕放到自己嘅顏料板，再將雪糕當成顏料，用黎畫畫。
Duffy 見到之後就話：「我都想畫啊！」Gelatoni 回答：「好，一齊畫畫丫！」
Duffy、Gelatoni 好開心咁畫畫，佢地兩個異口同聲咁講：「我地做好朋友囉！」
一杯意式雪糕令到 Duffy 遇上咗一位新朋友，原來 Gelatoni 呢個名字就係咁嘅意思！
配合 Gelatoni 誕生，東京迪士尼海洋 園內又會有啲咩特別野呢？以下係響發佈會舉行期間所拍攝嘅官方圖片，全部都係 Gelatoni 嘅主題商品、食品，場面非常墟撼！園方首輪將會推出九款主題商品以及兩款主題食品，於7月4日開售！
九款主題商品當中，有手提袋、原子筆、文件夾、便條簿等等嘅實用性物品。
另外亦有 Gelatoni 毛公仔、鎖題扣、電話繩、頭形掛袋呢類同 Duffy迪士尼小熊 類似嘅商品。
將 Duffy小熊 同埋 Gelatoni貓貓 兩隻毛公仔放埋一齊，佢地係唔係好襯呢？果然係一對好朋友！
至於主題食品，分別係意式雪糕甜筒以及餅乾甜點，兩款都會附送紀念杯。
發佈會後嘅一日，樂園裡面嘅壁畫又再出現變化，先前嘅草稿終於完成，Gelatoni 畫像完美呈現！
而 Duffy 乘坐貢多拉船嘅嗰幅油畫，最後完成品就係 Gelatoni 都坐咗響船上齊齊遊船河！
當年 東京迪士尼海洋 係響2010年推出 ShellieMay，相隔四年，Duffy迪士尼小熊 再有新朋友登場，唔知你對 Gelatoni 有咩第一印象呢？呢隻貓貓剛剛登場，暫時只有少量主題商品、食品，不過我相信慢慢會有更多機會見到佢！就等我地繼續期待啦！
香港迪士尼大概幾時才有gelatoni貓貓商品發售呢？
回覆刪除Gelatoni現階段係 東京迪士尼海洋 獨有角色, 應該短期內都只會響東京有售...
刪除Gelatoni is so lovely too^^
回覆刪除