去樂園玩，最掃興嘅，我諗都係落雨啦... 落雨嘅時候，我地自自然就會覺得好無癮；又要拎住把遮好唔方便，又唔適合玩戶外遊樂設施，又冇得拎住部相機影相... 總之一落雨，有好多野都做唔到，玩唔到，甚至唔知響樂園入面做咩好。
諗深一層，冇錯，我地一班賓客係好無癮；但背後有另一班人，比我地無癮一百倍，就係一班演藝人員。上次入樂園，差唔多成日冇停過雨，到傍晚先開始冇咩雨。當我同朋友已經差唔多玩哂所有室內設施之後，我地唔知做咩好... 我地行黎行去，終於見到 森林河流之旅 開返，就去排隊。( 唔知點解 森林河流之旅 每次落雨都成日暫停，我估係引擎入咗水的話會唔行得 )
排隊嘅時候，見到一個情景，一個又一個嘅演藝人員，拎住吸水掃把，當遊客一落哂船，就即刻衝上去不停咁掃，整乾啲座位。為嘅，就只係希望我地一班遊客坐得舒服，玩得開心。同一時間，佢地亦不斷努力地推一推帆布，整走船頂上嘅積水。
當上船嘅時候，我望都唔望好安心咁坐落個位到。結果，我嘅動作係錯誤嘅，我條褲即時濕哂。=_= 不過我都唔會有任何怨言，因為我知道，演藝人員經已盡最大嘅努力，將最好嘅體驗帶俾我地。我條褲係濕哂，但佢地有啲更加係成身濕哂，都毫無怨言。再一次響呢到，向每一位演藝人員致敬！
平日，演藝人員要做好佢地嘅職責，已經唔容易；佢地要顧及遊客嘅安全，又要滿足不同遊客嘅種種要求... 響下雨天，佢地嘅工作我諗係百上加斤。但佢地都依然堅持將歡樂送俾我地每一位遊客，呢種精神，正正就係我都想成為一位演藝人員嘅原因。
雖然，落雨嘅時候可能係冇咁好玩；但事實上，下雨天嘅樂園相比於平常嘅樂園，又擁有一個截然不同嘅景象。地下濕濕地，有幾灘水，眼前嘅事物又好似朦朦朧朧咁；都可以算係一幅別具風格嘅圖畫...
沒有留言:
張貼留言