要塞探險 - 加入探險家的行列!

之前分享 東京迪士尼樂園 嘅時候，我係跳黎跳去咁講，廢時講黎講去都係單一個主題園區。但其實 東京迪士尼海洋 呢邊，相對 東京迪士尼樂園 嗰邊黎講，係冇咁多設施嘅。所以今次，反而逐個逐個園區咁講係好啲嘅，不過重點遊樂設施當然都會留到最後啦！

返返去呢篇文章嘅正題啦！響 地中海港灣 嘅呢一邊海岸，有一個要塞，仲泊咗啲船響到添！

慢慢行過去，就會愈黎愈接近火山，亦開始進入要塞裡面啦。

要塞嘅入口有一啲瞭望塔，用黎監視住進入要塞嘅每一個人！

因為呢到係火山山谷，所以周圍都佈滿岩石；亦有一條小河流流出大海。

呢個時候，望返去對面，真係好似一個好優閒好寧靜嘅港口...

入到去要塞，都有好多佈置；例如有雕像噴水池、城樓等等。

雖然我地就冇真係上到去城樓上面，但響出面睇都可以見到好多機關。其實上面係一個遊樂設施黎嘅，叫做 要塞探險 Fortress Explorations。呢個要塞係由一班探險家建造嘅，所以上面有好多同航海技術有關嘅機關。

呢個遊樂設施附有探索指南，方便你上去發掘不同嘅事物。

我覺得，如果時間充裕的話，都值得上去睇下有咩得意嘅機關同埋佈置。因為睇完幅探索指南，上面都好似有幾多野睇；但好可惜，到訪當日嘅時間的確不太充裕...