響特備活動 迪士尼復活節奇幻世界 進行期間，東京迪士尼樂園 內每日都會有兩場主題巡遊。但好可惜，我去當日因為全日都不斷落住毛毛雨，令兩場復活節主題巡遊都要取消。不過，佢地就算取消巡遊，都仍然會出幾架花車，而唔會咩都冇得睇，可以話係不幸中之大幸。
第一架花車係屬於 愛麗斯 嘅，可以見到 瘋帽子 企咗響上面。佢夢遊時去嘅 仙境，咁啱同 復活節奇幻世界 都係 Wonderland，唔怪得要由佢黎帶頭啦！
之後嘅呢架花車，大家係唔係見到好大個 米奇 呢？其實我本身都以為係 米奇，但其實佢係叫 Oswald The Lucky Rabbit。佢個樣同以前嘅 米奇 都真係幾似架！不過身為兔仔嘅佢，就同復活節更架匹配啦！
呢架花車上可以見到 唐老鴨 同埋 白兔先生 等嘅迪士尼朋友。
之後就輪到 高飛 出場啦！呢張相我特別用咗旋轉木馬做背景！高飛 旁邊仲有佢囝囝 Max 響到啊！佢本身係塵響下面個瞄準器嗰到架，不過因為落雨而上咗去。
除咗佢地兩父子，呢架花車仲有 布魯托 同埋 奇奇帝帝。
話咁快就去到最後一架花車，係屬於 米妮 嘅。米妮 啲花車通常都係佈置到好華麗，當然呢架都唔會例外；呢架花車有好多絲帶，仲有一隻隻小雞響上面添！響花車上面陪伴住 米妮 嘅仲有 黛絲，以及松鼠 Clarice。
花車嘅最後仲有 米奇 啊！上網睇返片，發現原本佢係響地上面周圍走；亦因為天雨關係而調到去花車上面。
我始終都係覺得好遺憾，因為落雨而冇得睇完整嘅巡遊... 原本仲有好多好靚嘅花車架，更加有 Pooh！只怪自己運氣唔好...( 抽復活蛋時又話自己好運，而家又話自己運氣唔好，咁你究竟想點 !! 0_0 )
沒有留言:
張貼留言