今日係我人生中一個好重要嘅日子，因為今日係首屆香港中學文憑試嘅放榜日啊！面對呢個完全陌生，一啲以往參考資料都冇嘅公開試，之前都真係下過一番苦工。好彩，今日放榜，我嘅成績都算唔錯，只係中文有點兒失手... 不過都有好大機會入到大學嘅。但可能就未必入到我本身想讀嘅建築啦，唯有改變策略，改選工程啦！我真係好想成為一位 迪士尼幻想工程師，參與眾多樂園奇妙體驗嘅製作過程！
除咗入到大學呢個好消息之外，今日仲有一個連帶嘅好消息降臨！其實我真係一個好幸福嘅男仔，生活響一個愉快嘅家庭入面，爸爸媽媽都對我好好。考今次公開試之前，爸爸同我講，假如我成功取得本地資助學位的話，佢就會送一份禮物俾我。而呢份禮物，真係非一般咁奇妙！因為佢將會帶我去美國迪士尼玩啊！！真係好開心！！雖然暫時未知幾時去，但美國有兩個 迪士尼渡假區，都要諗定去邊個嘅...
位於加洲嘅 迪士尼樂園渡假區 Disneyland Resort，入面有全世界嘅第一個迪士尼樂園。基本上，呢個 迪士尼樂園 Disneyland Park 同 東京迪士尼樂園 嘅佈局好相似，但都有一個獨有嘅主題園區，以及一啲獨有嘅遊樂設施同埋場景，所以都想去睇下。
渡假區入面另一個主題公園，就係剛剛更新完嘅 迪士尼加洲冒險樂園 Disney California Adventure。入面有幾個好特別嘅園區，我都幾有興趣，特別係新開幕嘅 反斗車王天地 Carsland。
至於第二個位於美國嘅迪士尼渡假區，就係 華特迪士尼世界 Walt Disney World。呢個渡假區大好多，一共有四個主題公園，不過就位於更遠嘅佛羅里達州。當然就唔會少得迪士尼樂園啦，呢到嘅迪士尼樂園被命名為 神奇王國 Magic Kingdom。入面嘅 幻想世界 Fantasyland，正進行大型粉飾工程，今年年尾就會完成，好似都幾靚喎！
第二個樂園叫做 Epcot 未來世界，意思係「實驗性未來模範社區」咁解。( 譯得唔好請見諒！)入面有啲關於未來嘅展館同遊樂設施，同時亦有不同國家嘅展館，融合咗不同文化。
另一個響渡假區入面嘅樂園就叫做 迪士尼好萊塢影城 Disney's Hollywood Studios。叫得做影城，就即係一個以電影做主題嘅樂園啦，呢到有好大頂我最鍾意嘅 米奇魔法帽！
最後一個主題公園就叫做 迪士尼動物王國 Disney's Animal Kingdom。上面講嘅 Epcot 就好似係一個加大版嘅 明日世界，而呢個就可以話係一個加大版嘅 探險世界。入面嘅佈置以及遊樂設施都係同動物有關嘅，而呢棵 生命之樹 TheTreeOfLife 係入面嘅地標。
兩個 迪士尼渡假區 真係各有各好！搞到我有啲難抉擇... 真係要用多啲時間諗諗...
沒有留言:
張貼留言