多得呢一次嘅 東京迪士尼之旅2012，俾到我有機會寫更多文章同大家分享... 昨日就已經為大家誠意獻上第300篇文章，一個由小弟重新演繹嘅 東京迪士尼海洋 驚魂古塔 故事。
原來響轉眼間，300篇大大小小、不同主題嘅文章響過去十個月慢慢誕生。對我黎講可以話係一個壯舉，因為之前都講過，我自己好多時都三分鐘熱度，好易就會失去恆心。但係，一份對迪士尼嘅愛，促使我上年開始寫Blog，亦令我能夠將呢一份動力維持到今時今日。
其實，我細細個嗰時，就已經好似就同迪士尼結下不解之緣... 三歲時爸媽帶我去到 東京迪士尼樂園；再大個小小，佢地又帶我再去 東京迪士尼海洋；到十一歲嘅時候，又再有機會去訪 巴黎迪士尼樂園渡假區；之後到咗2005年，香港迪士尼樂園開幕：再去到2007年擁有第一張屬於自己嘅 全年通行証。
剛剛好簡略咁睇返過去嘅300篇文章，每篇都記載咗我內心嘅感覺，每一篇都有佢嘅意義。再此，我亦要多謝各位一直睇呢個Blog嘅朋友，多謝你地肯花時間去用心睇我所寫嘅野；除咗對迪士尼嘅愛，你地每一個嘅支持，你地嘅每一個回應，都係對我嘅一份鼓勵！
但事實上，有一個問題一直都存在著響我嘅心裡面，就係文章主題嘅問題... 響平日，如果唔係有一啲特別事發生 ( 例如我去咗 東京迪士尼渡假區 )，其實我係冇咩好寫。=_= 所以我呢排開始構思：咁響一啲淡季、平靜嘅日子，呢個Blog可以點樣生存落去呢？我自己有啲咩長處呢？寫故事、整下圖、影下相咁樣。唔知呢啲小技能用唔用得著呢？
迪士尼黑色世界2012 過多大約一個月就開始啦，所以我暫時都唔洗太擔心冇野好寫嘅... 不過無論點都好，我相信響不久嘅將來，呢個Blog將會出現更多元化、更多面性嘅文章！希望咁多位朋友可以繼續支持小弟嘅呢個Blog啦！多謝各位！:)
沒有留言:
張貼留言