我都好似未試過直接放個遊樂設施個名上去做標題就算，今次係第一次。我今次直接放個名係因為我覺得佢個名好長，好搞笑，好似都冇咩遊樂設施個名會咁長！XD 黎到第三個重點遊樂設施，Indiana Jones Adventure: Temple Of The Crystal Skull；呢個遊樂設施係根據返同名電影黎設計嘅，一睇個名就知道係關於一個驚險刺激嘅旅程啦！所以佢係位於 失落河三角洲 嘅，而呢個遊樂設施嘅神殿亦成為呢個園區嘅地標。
唔知大家有冇睇過呢套電影呢？我就未睇過啦，如果睇過先黎玩，應該會更加有趣！呢個故事係講述 Indiana Jones博士 想尋找呢個魔宮入面嘅 青春之泉，但係響魔宮入面喚醒咗守護神 水晶骷髏頭，因而獨發魔宮內一系列嘅機關。而 Indiana Jones博士 就要帶領我地一班探險家離開險境！
寫咗咁多篇關於東京兩個樂園嘅文章，黎到呢一刻，大家終於都可以一睹 Fastpass 嘅真面目！整體黎講同香港都冇咩大分別，不過最底就有一段關於呢個遊樂設施嘅日文提醒字句。雖然我唔係好識日文，不過大概都估到係咩意思，係叫你將啲物品放響座位前嘅儲物袋。
周圍都佈置得好有神秘感，底下嘅火柱令到神殿睇起上黎更有氣勢！
響故事角度黎講，呢個神殿都都應該存在咗好耐啦，所以都有一啲日久失修嘅跡象。
入到去神殿裡面，有好多石像，令到整個氣氛變得更加詭異...
嘩！有好多骷髏骨啊！係咪提示緊我地應該走人...？唔得！作為探險家，係唔可以咁易放棄架！
響等待區繼續行，感覺愈黎愈神秘。大家可以留意一下啲石磚，有啲特別加上流水效果，好逼真！
呢到亦設立咗一個工作枱，相信係用黎研究同埋部署好尋找寶藏嘅方法。
經過一系列嘅等待區佈置之後，就可以登上越野探險車，開始探險旅程！旅程途中同之前介紹過嘅 加勒比海盜 一樣，都係有一啲整得好似真人嘅人像。 不過我覺得最正嘅，係一啲你估唔到嘅場景同效果；突然左搖加擺、加速、退後，好刺激！
我最鍾意玩呢啲結集故事同埋刺激兩種元素嘅遊樂設施，可以體驗一個驚險、有趣嘅旅程。但係呢兩日玩呢啲較刺激嘅遊樂設施時，有一個擔憂... 就係怕我個袋入面嘅兩隻 Duffy 會飛出黎，係嘅話咁就大件事啦！所以我整個過程都會用隻腳夾實佢地，哈哈！
而家只係剩下最後一個我最愛嘅遊樂設施啦，佢嘅故事真係好吸引... 下篇文章繼續分享！
沒有留言:
張貼留言