今日早上知道咗大學聯招嘅結果，昨晚全晚都不斷發夢，全部都係關於聯招嘅夢。=_= 當我心情平伏返之後，當然就要上黎同大家分享喜訊啦！話哂呢到都係我主場喎！哈哈！我俾 科大 取錄咗，將會入去工程學院；雖然唔係最鍾意嘅科、學校，但有大學讀都已經好開心。之後，我可以繼續向著 幻想工程師 呢個夢想進發！我知道的確一啲都唔簡單，但我會堅持架！
但係呢，入到大學固然係開心啦，而更開心嘅係，我可以去美國加洲 迪士尼樂園渡假區 玩啦！之前文憑試放榜都同大家分享過呢件事，不過當時就未決定好未邊一個美國迪士尼。之後我就向一位網友，一位我好敬佩嘅主題公園粉絲，徵詢一下佢嘅專業意見... 聽完佢嘅意見，我而家就選擇咗加洲，至於 Walt Disney World 就遲啲我再大啲嘅時候先再諗啦！
加洲 迪士尼樂園渡假區 一共有兩個主題樂園，正常黎講，應該都會去哂兩個架啦... 另外，仲有一個我都好想去嘅 Legoland 樂園，距離 迪士尼渡假區 大約一個小時嘅車程。可以一次過去三個主題樂園玩，真係好興奮啊！相信到時一定又會影到好多相返黎！出發日期就未定嘅，我諗都係下年6月到啦... 但我已經急不及待，加咗一個新嘅文章分類啦！
最後，我想趁呢個機會，再一次多謝一直支持我、鼓勵我、祝福我嘅朋友... 特別係由公開試開始就陪伴住我嘅朋友，多謝你地俾咗好多信心我，我先唔洗太擔心咋！要實現一個夢想，並唔係一朝一夕嘅事，需要經歷長年累月嘅磨練，先至能夠成功；希望大家可以繼續見證我嘅成長，與我一同繼續向前走，一同邁向未來！
沒有留言:
張貼留言