呢篇文章將會分享到 東京迪士尼海洋 嘅第三個主題園區，美人魚礁湖 Mermaid Lagoon。呢個園區嘅佈局好特別，除咗戶外區域，仲有一個都幾大嘅室內區域。而個室內區域更加設計到好似 小魚仙 嘅海底宮殿，就連個入口都整得特別瑰麗。但其實，響以下張相可以見到呢個入口位置正進行粉飾工程，不過都依然係非常漂亮！
呢個入口整到好似珊瑚礁咁，除咗有啲小瀑布之外，珊瑚上更加有一粒粒嘅海星！
之前嗰日得我一個去 東京迪士尼樂園，所以都唔太方便同 Duffy 佢地影相。至於呢日黎到呢邊，有爸媽一齊，終於有機會同佢地影下相啦！其實我本身都冇諗住同佢地影相，因為佢地兩個好乖坐咗響我個袋入面，影相的話就要拎佢地出黎，幫佢地擺好姿勢，影完之後又要放返入去，有啲麻煩同頗為需時... 不過去到呢個位置，媽媽突然提議幫佢地兩個影下相，咁就同佢地影下啦！
好啦，同佢地影完相，睇返周圍嘅佈置先。呢到有一個 艾莉奧 嘅銅像。
有 艾莉奧 響到，當然就唔少得佢嘅好朋友，小胖 啦；不過就見唔到 沙巴信。
行到入去仲有人魚之王 King Triton！佢仲坐咗響海豚車上面，好有氣勢！
呢到真係有好多銅像，果然係皇宮！國王旁邊仲有一啲魚侍衛嘅銅像。
開始深入宮殿裡面啦，周邊都有好多小裝飾，感覺上好似真係去咗海底咁。
牆上面全部都係珊瑚同埋岩石。另外，雖然有燈，但係呢條通道都有啲暗，造出潛落海底嘅效果。
終於黎到宮殿嘅深處啦！呢到就好似係一眾海洋生物嘅小天地咁！
入面呢到都有好多不同嘅遊樂設施，不過主要都係俾小朋友玩嘅。例如有 旋轉海藻杯 The Whirpool，即係海底版嘅旋轉杯啦，仲有 跳躍水母 Jumpin' Jellyfish，我會將佢形容為兒童版嘅 玩具兵團跳降傘。以下呢張相入面嘅就係 河豚氣球競賽 Blowfish Ballon Race，應該都係同 小飛象 差唔多。
呢到亦有一個叫做 艾莉兒遊樂場 Ariel's Playground ( 佢地譯做艾莉兒 ) 嘅遊樂設施。係一個同 泰山樹屋 同類型嘅遊樂設施，都係俾賓客探索故事世界，而呢到就用 小魚仙 做背景。上網睇返，先知道原來佢個範圍都幾大，有好幾個場景，我當日只係留意到呢個噴水區。同之前嘅 要塞探險 一樣，呢到亦有提供探索地圖，不過我就拎唔到，又係上網睇返先知。
除咗以上提及過嘅遊樂設施，室內呢到亦有一個 美人魚礁湖劇場 Mermaid Lagoon Theater。上演嘅，當然都係同 小魚仙 有關嘅故事啦！仲要係真人演出嘅音樂劇黎架！呢到仲有一條沉睡中嘅大鯨魚，其實係一間商店黎嘅，好得意。
每論係兩個主題公園入面，定係渡假區內其他位置，都有好多奇妙鑄幣機，呢到都有一部。
我就冇特別影低每一部嘅奇妙鑄幣機，但其實每一部都跟返所屬區域嘅主題，仲設計得好靚架！我自己都整咗好多個奇妙鑄幣留念，之後會再同大家分享！:)
沒有留言:
張貼留言