東京迪士尼海洋 除咗作為 Duffy 聖地，同時亦有全球獨家嘅 ShellieMay迪士尼小熊。ShellieMay 其實係一隻女仔嘅迪士尼小熊黎嘅，同 Duffy 好似樣，不過都有少少唔同嘅。其實我本身都猶豫緊買唔買好，因為我自己對 ShellieMay 不太感興趣；不過，媽媽之後就話：「獨家喎！咁都唔買？最多我買一隻俾你啦！」所以，最後就我買一隻 春日巡航裝Duffy，媽媽就買一隻 春日巡航裝ShellieMay，湊成一對。
咁 ShellieMay 同 Duffy 究竟有咩唔同呢？等我望真啲先！最主要就係 ShellieMay 啲毛係有少少粉紅色嘅；以及眼睛邊緣係淺藍色，同埋有眼睫毛。大家留意一下，平時啲 Duffy、ShellieMay 熊仔係合埋口嘅，而呢一對個笑容係少少打開口嘅。
另外，佢地屁股上嘅 米奇 頭型圖案都有啲唔同架！Duffy 嘅響左邊，ShellieMay 就係響右邊。
睇完隻熊仔個身，之後就睇返呢套春日巡航裝有咩特別先！Duffy 嗰頂帽有啲似一頂農夫帽，中間仲有一個代表 Duffy 嘅「D」字。
件衫就係一件冷衫黎嘅，又係有一個「D」字嘅徽章，Duffy 著起上黎睇落好斯文啊！
件衫係連住隻熊仔嘅，冇得除落黎，可以話係 春日巡航 活動嘅特別版啦。既然係特別版，就連個招牌都有唔同架！招牌換咗做綠色，上面亦有一啲有關春天嘅圖案。
至於背面就係今次 米奇和Duffy的春日巡航 特備活動嘅標誌。
至於女仔 ShellieMay 呢，套衫以粉紅色為主，頭上戴有一個頭飾，仲有一朵花響上面架！
除咗頭飾上有花朵，仲有一條由花朵組成嘅頸飾，旁邊仲有一啲貝殼添！
招牌上就寫有「ShellieMay The Disney Bear」嘅字樣；同 Duffy 一樣，招牌上都有春天圖案。ShellieMay 原本個招牌都係淡啡色嘅，而呢個春日巡航特別版就係黃色嘅。而背面都有活動標誌。
呢對春日特別版熊仔，除咗有附送原先嘅 Duffy、ShellieMay 故事冊之外，仲有一個春日巡航牌。
之前就同大家分享過日文版 Duffy 故事冊同香港版有咩唔同，今次就同大家一齊睇下 東京迪士尼海洋 獨有嘅 ShellieMay 故事冊有咩特別啦！上面張相可以睇到封面就由 米奇、Duffy，換上咗 米妮、ShellieMay。而故事冊嘅第一頁，就同樣係有位置俾呢隻熊仔嘅擁有者寫上自己嘅名字黎做個記念嘅。
啲圖嘅介紹又係用日文寫嘅，又要玩看圖估故事。=_=至於最後就有一張 Duffy 同埋 ShellieMay 一齊坐響到嘅圖片，亦都終於有一句英文...「You can be friends with Duffy and ShellieMay, too! 」大家都可以同呢兩隻熊仔做朋友架！
呢一對 Duffy、ShellieMay 嘅大小屬於係我所稱嘅 小Duffy，即係同 愛神Duffy 一樣。咁又等我拎呢隻 春日巡航Duffy 同 愛神Duffy 比較一下啦！大小其實真係差唔多嘅。
不過就同之前 大Duffy 一樣，腳掌上嘅圖案，東京 Duffy 又係深色過香港 Duffy 少少嘅。
好啦！佢正式加入我地嘅 Duffy家族，成為第六個成員！今次亦首次有 ShellieMay 加入，真開心！
沒有留言:
張貼留言