鍾意 Duffy 嘅朋友要留意啦！因為之後全部 東京迪士尼海洋 系列文章都係同 Duffy 有關架！東京迪士尼海洋 作為 Duffy 勝地，當然有好多關於 Duffy 嘅野啦；再加上到訪當日進行中嘅 米奇和Duffy的春日巡航 活動，就有更多關於呢隻熊仔嘅野響園內出現！
響 春日巡航 活動期間，園方特別推出咗三個全新嘅節日表演，全部都有 Duffy 份架！第一個就係響 地中海港灣 對出水面進行嘅 春臨里多島 Lido Isle Welcome To Spring。之前都俾過大家睇相，演出時，一班 迪士尼朋友 會坐船出場，之後再上岸表演！第二個表演我就冇睇到，係響 美國海濱 園區內上演嘅 紐約復活節 Easter In New York。最後一個呢，就響 阿拉伯海岸 入面演出嘅，叫做 驚喜迎春 Springtime Surprise。呢一個我有幾乎睇哂全個表演，所以影到多啲相，而家就俾大家睇下啦。以下呢張相就係演出場地啦，嗰個阿拉伯式建築物嘅底下有一個舞台嘅。
舞台上更加掛有 米奇和Duffy的春日巡航 活動旗幟；好大幅，色彩繽紛，好靚。
響表演開始之前大約一個鐘，就已經有好多 Duffy 粉絲坐咗響舞台前面慢慢等待啦！不過我地嗰日得咁少時間，又點會響到坐足一個鐘丫！所以我地趁未開始之前響主題園區內玩下。當我地準時返到去嘅時候，已經係去到較後嘅位置啦！好彩又拎支長鏡頭去影相咋！
表演一開始，米奇 就拎住之前介紹過嘅藍色行李箱走出黎；睇下佢個樣幾興奮！
當然唔少得 米妮 啦！佢地呢對情人響埋一齊，幾溫馨！啲動作仲好齊添！
之後就到著住春日巡航裝嘅 Duffy迪士尼小熊 出場啦！好可愛啊！佢個樣傻下傻下咁，好搞笑！
Duffy 同埋 米奇 都好合拍架！始終都係 米奇 帶佢出黎旅行嘛，唔合拍又點成事呢？
平時睇 Duffy 個故事，係講 米奇 同埋 Duffy 兩個人去旅行探險嘅，不過今次就有啲唔同；有埋 米妮 同埋 ShellieMay，兩對情侶一齊去旅行！又俾大家睇下 Duffy 同佢女朋友一齊嘅相啦！
呢個表演都係全程用日文黎旁述，搞到我又要估估下... 我簡略理解到，係講佢地去到世界各地進行春日巡航，今次就黎到 阿拉伯海岸 稍作停頓。響到表演尾段，燈神仲突然飄出黎！我諗佢應該係黎歡迎 Duffy 佢地啦！
唉，唔得！下次去 東京迪士尼渡假區 之前，一定要學好啲日文，如果唔係又唔明佢地講咩！其實我好耐以前已經想學日文，不過又係半途而廢，哈哈！但係今次有 Duffy 作為我嘅推動力，我諗我會學得成嘅！為咗 Duffy，我會努力嘅！
沒有留言:
張貼留言