兩套 東京迪士尼海洋 的 Duffy 服飾 - 漁村休閒裝

而第二套服裝就係用作 CapeCod 漁村做主題嘅；相比起春日裝，我就比較鍾意呢套啦！因為覺得佢靚啲，有多啲配件，仲要平啲！但春日裝嘅做工的確係更細緻，所以貴啲都合理嘅...

呢套服裝所附送嘅 Duffy 小衣架，同香港買得到嘅休閒裝係一樣嘅，係比較純樸嘅設計。順帶一提，香港嗰款休閒裝其實原先係 東京迪士尼海洋 出品嘅，係之後先推出到其他主題樂園。

又係由頭飾開始講起啦！呢頂咁特別嘅水手帽，旁邊有一個船錨圖案。

至於上衣，就係一件藍白間條水手T恤，設計得比較簡單，相信係想將焦點放響吊帶褲到。

呢條吊帶褲，有啲似牛仔褲，不過當然就冇牛仔褲咁厚啦！上衣同條褲設計到非常匹配。

我最鍾意嘅配件就係呢條小頸巾，幫 Duffy 綁響頸上，非常有型有款！

鞋呢，又係用作比較簡樸嘅設計，米白色；鞋底就係淡啡色嘅。

最後就有一個小布袋，上面更加印有 CapeCod 漁村圖案以及 東京迪士尼海洋 嘅標誌。

好啦，又著好成套衫啦！呢套衫就用作香港 大Duffy 黎做模型！( 相中 Duffy 戴住嘅水瓶頸飾並非呢套漁村休閒裝嘅一部份，需另外購買，遲啲會再分享。)

大家都著哂新衫，又有新朋友加入，梗係要影返張 Duffy家族 全家福啦！( 呢張相係去完旅行返黎冇幾耐影嘅，當時都未有第10隻 Duffy，得9隻，以及2隻 ShellieMay。)

兩套 Duffy 新服飾都各有特色，唔知你又鍾意邊一套多啲呢？定係兩套都咁鍾意呢？