其實 美國海濱 呢個主題區域都幾大，呢個園區嘅入面都分咗做好多部份。今次要介紹嘅就係最後一個未講過嘅部份，亦係全個 東京迪士尼海洋 之中我最感興趣嘅地方！呢個區域就叫做 Cape Cod 鱈魚灣，被設定為一個寧靜嘅小漁村，不過佢之後一舉成名喎！( 事實上，園方並冇設立中文譯名，但其實 Cape Cod 鱈魚灣 係一個真正存在嘅地方黎嘅。)
點解話佢一舉成名呢？全因為 Duffy！咁係因為當 Duffy迪士尼小熊 響日本大受歡迎之後，東京迪士尼海洋 園方就將呢到改為 Duffy 嘅故鄉，呢個漁村就自此人頭湧湧啦！大家可以留意下周圍嘅建築物，啲風格有啲似 灰熊山谷 入面嗰個小鎮；另一值得留意嘅地方，就係響之前介紹嘅明信片套裝入面，都可以見到呢啲建築物嘅畫架！
除咗 Duffy 之外，身為一個漁村，Cape Cod 入面都有好多同漁業有關嘅佈置架！響岸邊就有一個 船長米奇 銅像，佢緊握船舵，好有型啊！
另一邊嘅懸崖上，就有一座燈塔，響晚上嘅時候引導海上嘅船隻。
呢個 Duffy 故鄉呢，我幫佢改咗另一個名，叫做 Duffy基地，因為響平時，所有關於 Duffy 嘅野都集中哂響呢到，只係嗰陣有春日巡航活動，先可以響其他園區見到 Duffy。
先有 Cape Cod Village Greeting Place 漁村迎賓小屋，可以響入面同 Duffy、ShellieMay 影相。
不過通常都起碼要排60分鐘以上，有時仲要排150分鐘！當日唔夠時間，所以冇去影...
另一個關於 Duffy 嘅地點，就係呢間商店啦！佢叫做 裴葛姑媽村莊商店 Aunt Peg's Village Store。
上網見到，假日人多嘅時候，係要拎籌先可以入去買野！Duffy 果然係人氣爆燈！
一入門口，就有一個好大個嘅春日巡航招牌歡迎我地，旁邊仲有兩隻 迪士尼小熊 嘅頭型響到！
底下有一張木椅，坐咗幾隻大小不同嘅 迪士尼小熊 響到，有啲有服飾，有啲冇。
假如你以為上面張相入面嗰兩隻係 巨大Duffy 同埋 巨大ShellieMay 的話，咁就錯啦... 因為佢地係 超級巨大Duffy 同埋 超級巨大ShellieMay，尺寸就比起 巨大Duffy 大超過一倍！至於價錢... 承惠50000日圓，亦即大約5000港幣，足足係 巨大Duffy 嘅五倍 ( 以原價$980計算 )！
入面賣嘅，全部都有 Duffy 同埋 ShellieMay 嘅系列商店黎架！我嗰日響入面瘋狂掃貨！
黎到呢個區域，就好似置身於一個 Duffy 世界一樣；我呢位 Duffy 少CapeCod 入面仲有一個好重要嘅景點，我真係超鍾意嗰到啊，真係好正！遲啲再同大家分享！
沒有留言:
張貼留言