唔知點解，次次入Camp或者去旅行，偏偏就突然會有好多新消息公佈，搞到好似好落後咁... 今次入Camp，去咗三日兩夜，就正正響呢三日，樂園方面公佈咗 迪士尼黑色世界2012 嘅資料！雖然暫時未係好詳細，但睇咗啲簡介，只可以講句：今年值得一讚！
每年萬聖節 迪士尼黑色世界，我覺得係全年最具規模嘅節日活動，同時亦係我最愛嘅節日活動。特別係呢兩年，園方響活動中加入一個完整嘅原創故事，令整個活動變得更有氣氛。上年嘅 斷頭騎士，原本係參考同名電影嘅，之後就配合樂園內各個景點而變成一個原創故事；而今年，樂園就用咗 黑色兩路 呢個主題，講述 殭屍陣營 同埋 狼人陣營 響園內爆發戰爭。
同樣係一個原創故事，但今年就更加高一個層次，因為我覺得兩大陣營對決嘅故事係更加吸引；同時亦可以俾賓客選擇加入邊一個陣營，令到我地都可以親身投入故事入面。
現階段只係好初步嘅宣傳，但係已經可以見到今年嘅宣傳係落咗好多心機。我想讚嘅，係每張圖都做到好有效果；一張圖，就已經可以顯示咗陣營特點、戰況激烈嘅效果。
雖然樂園強調佢地請咗韓國明星、明模去扮演兩大陣營嘅首領，但呢樣我反而覺得唔咩特別；因為我唔知道佢地係邊個，而我亦相信一般香港人亦唔太熟悉佢地係邊個... 反而每一張圖都真係做得咁仔細，咁有效果嘅時候，絕對比起用名人更加有魅力！不過我個人黎講係比較鍾意殭屍陣營，所以希望可以快到見到另一陣營嗰張圖啦！
其實，我覺得 香港迪士尼樂園 呢邊，輸俾對手嘅，主要係唔夠恐怖同埋唔夠鬼屋。事關人地每年都可以有八個或以上嘅鬼屋，而我地呢邊就成日都係得兩三個... 所以 香港迪士尼樂園 就運用咗自己嘅強項，用咗氣氛同埋故事黎造勢。但同時，我好佩服嘅係，園方亦都好積極去面對自己嘅弱點，嘗試引入更多新嘅鬼屋；先有 黑色馬戲班，後有 詭墳學院，當然及不上人地每年全部都係新嘅鬼屋，但已經係一個好開始。再者，好多人都認為對手的確只係著重恐怖、嚇人，而呢邊就另外會再著重佈置、裝飾。
至於講到商品，事實上，每年 迪士尼黑色世界 都係我大出血嘅時刻... 因為每年嘅商品都好靚，再加上園方特別為 黑色世界 推出比平時款式多好多嘅商品。但係，我覺得有啲可惜嘅，就係每年嘅野都係差唔多，只不過係個圖案唔同咗... 假如上年已經買咗嗰樣野的話，今年就未必會再買啦... 所以，如果能夠有更多品種嘅商品就更好。
撇開呢個小缺點，都依然有好多商品好吸引；當然，其中最值得我注意嘅，就係 Duffy 嘅商品啦！有好多 Duffy 粉絲見到呢張圖嘅時候 ( 包括我自己 )，會覺得好失望，因為件衫同上年一模一樣。但當我睇真啲嘅時候，發現呢隻其實係一隻新嘅 小Duffy 黎架，呢到並唔係講緊件衫！雖然衫係一模一樣，但呢隻 小Duffy 手上係多咗一個南瓜筒架！我諗佢將會成為我嘅第11隻 Duffy！
好啦，暫時講到呢到先，因為始終現時嘅資料都未係好詳細，要等遲啲再公佈先知。整體黎講，今年活動真係做得好好！唔知，您地暫時對今年 迪士尼黑色世界2012 有咩感想呢？心中的感想 呢個新分類主要都係想同大家討論一下樂園嘅野，所以好歡迎大家一齊分享架！
沒有留言:
張貼留言