原先就諗住響今年 迪士尼黑色世界2012 申請做兼職演藝人員，不過好似事與願違咁... 之前應該因為未夠18歲，所以等咗好耐，樂園方面一直都冇搵我去見工；好啦，到我過咗18歲生日，又發現，並唔係一過咗18歲，所有問題就會迎刃而解...
可能大部份中小學生響上個禮拜就開咗學啦，不過我就今日先至正式開學；大學因為要應付今年雙學年額外嘅入學生，所以延遲咗開學日，有啲甚至下個禮拜先開。而大學其中一樣好自由嘅野，就係可以自己編制時間表，自己決定幾時上堂。今日開學啦，亦即表示自己嘅時間表基本上已成定局，可以再改嘅機會並唔大。
我本身就以為可以好理想地空出一至兩日俾我返工，但事實上當然冇咁完美啦；因為抽籤等嘅因素，所以響編時間表嘅時候都有好多限制，我而家五日都要返。黎到呢一刻，我想成為一位演藝人員嘅夢想又要擱置啦...
不過，我一直都好明白，要實現夢想，並唔係一件簡單嘅事；但我同時亦深信，只要自己堅持，到最後一定可以成功實現夢想嘅！其實，從另一個角度諗，都係一件好事黎嘅；可以俾我有多啲時間適應新嘅學習環境。唔緊要啦，今年就繼續以賓客嘅角色黎欣賞 迪士尼黑色世界2012 啦！
沒有留言:
張貼留言