消失了的 Duffy Vinylmation?!

我本身就對 Vinylmation 冇咩興趣嘅，主要係因為覺得啲模型唔靚，唔夠吸引...  每個模型個頭都用咗 米奇 頭型，之後再將各個 迪士尼朋友 個樣整上去，好多都走哂樣...

好啦，前排響 Duffy迪士尼小熊 Facebook專頁上面見到美國嗰邊出咗新嘅 Duffy Vinylmation。一共出咗兩款，一款係毛絨 Duffy 模型，另一款就係水手裝 Duffy模型。因為 Duffy 個頭原本就係用咗 米奇 個頭型黎設計嘅，所以呢兩款模型完全冇走樣嘅情況。我作為一個 Duffy 嘅粉絲，而呢兩款模型又設計得唔錯，咁當然要買佢地返屋企啦！





我本身都唔期望可以響 香港迪士尼樂園 買得到，因為呢邊啲入貨速度唔算快；所以我就諗住下年去美國加洲 迪士尼樂園 嘅時候先至將佢地據為己有。但係又估唔到，今次香港呢邊又咁快又得賣喎！樂園官方專頁前幾日就展示咗上面嗰張相。

嘩！啱哂！9月2日開始賣，我9月3日會入去樂園玩，實買到啦！真係太好啦！正啊！但係當我9月3日響樂園諗住買嘅時候，我搵極都搵唔到，之後問啲演藝人員嘅時候...  佢地竟然答覆我：「唔好意思啊，兩款都已經賣哂，暫時未有貨。」我即時感到非常無奈...

Duffy 產品響 香港迪士尼樂園 一直都可以話係滯銷，園方更加係要減價黎促銷；今次佢竟然同我講，一款 Duffy 嘅產品，竟然響開售日嘅第二日，就已經賣哂，冇哂貨？！唔好講話 Duffy 產品，就算係其他產品，要有咁嘅情況，都已經係奇跡啦！

我唯一推斷到，可以解釋呢個情況嘅，就只可以係園方未入好貨嘅時候就開始咗宣傳。我真係唔相信，一件貨品，唔夠兩日就可以賣哂；只有一個可能性，就係個數量係異常地低...  明知個數量咁少，未入好貨，咁點解又要急住同人地講話有得賣？咪只會搞到空歡喜一場？

我嗰日本身已經計劃好入去玩就話冇咩問題啫；但如果其他人係因為知道有得賣而特別入去呢？老實講，我當日真係幾嬲，我諗住買黎送俾自己做生日禮物嘛...  好彩有另一樣商品補返數...  聽聞又已經入返貨啦，咁我只好期望下次入去可以買得到...  我唔希望再會有同樣情況發生...