人地士兵響到用繩運緊貨，佢就響到玩，真係貪玩啦！( 仲玩到頂帽就黎跌添... =_= )
好啦，坐咗響降傘上面啦！士兵們，準備出發！( 因安全理由，Duffy 係冇一齊玩嘅，唔洗擔心 )
咁好玩，當然唔好停啦！去到第二個遊樂設施，轉轉彈弓狗！Duffy 響木屋入面參觀...
當日冇咩人，幾乎唔洗等，一行入去，下一轉已經可以玩。等緊嗰陣，同 彈弓狗 影返張相啦！響呢個時候，有一位演藝人員姐姐見到 Duffy 掛咗個生日襟章，就問佢係唔係生日，哈哈！
有得玩啦！我地上車啦！今次 Duffy 都可以一齊玩！Good！
因為爸媽唔係太想玩 沖天搖控車，所以我地冇玩到，之後就向 灰熊山谷 進發...響離開 反斗奇兵大本營 之前，都不忘響出口同 抱抱龍 影返張合照留念！
之後去到 迷離莊園！雖然仲未起好，但係 Duffy 響經過 迷離大宅 嘅時候，都響到影咗張相！期待開幕後再黎過！
經過 迷離莊園 後，就黎到 灰熊山谷 啦！入到黎西部小鎮，當然要同個招牌影張相先啦！
Duffy 響小鎮入面周圍玩，周圍影相；佢走上木筒、馬車，似乎對鎮上嘅佈置好感興趣喎！
黎到 灰熊山谷，又點可以唔玩呢到嘅地標 灰熊山極速礦車 呢？於是我地就去排隊啦！
等待區入面又有好多佈置，Duffy 又覺得好得意，佢響採礦公司辦公室入面又影咗張相。
除咗室內嘅佈置之外，戶外嘅園藝裝飾都好靚架！所以 Duffy 又搵咗一個靚位影相！
Duffy 更加響呢個位見到礦車高速駛過，一陣就到我地玩啦！好緊張啊！
嗰日其實係大部份中小學嘅開學日，園內唔算多人，排咗大約5-10分鐘，就可以上車。
Duffy 玩完礦車之後，唔單止冇驚，佢仲更加興奮！所以我就帶咗佢去 噴泉山谷 睇下。但係我梗係冇俾佢去玩水啦，佢濕咗水嘅話就大件事啦！我地睇下風景就可以啦...
灰熊山谷 仲有一樣出名嘅野，就係金塊啦！Duffy 見到呢舊足足比佢大幾倍嘅金塊，感到好驚訝！
響宏偉嘅 灰熊山 前面影多幾張相啦！睇返張相，發現當日天氣唔錯喎，啲雲好靚！
知唔知我地之後去咗邊個園區呢？依照我地嘅路線黎估，相信你一定估到嘅！嘿嘿！我地就響 迷離莊園 嗰邊入去 灰熊山谷，跟返條路行，自然就會響 探險世界 出啦！原本媽媽就想睇 獅子王慶典 嘅，不過見到有仲有少少時間，就去玩咗 森林河流之旅 先。
我地出發啦！旅途上遇到好多森林動物，雖然今次就冇熊，但係 Duffy 見到咁多動物都好開心！
響 森林河流之旅 排隊嘅時候比預期中長，所以最後要趕返去 原野劇場，好彩未開始咋！
睇完一個咁精彩嘅表演，響離開之前，Duffy 走咗埋去同 彭彭 影返張相留念。
再響出面等待區嘅部落村莊影多幾張相先！頭先最後一刻先入去，所以唔夠時間影，而家補返！
響 探險世界 唔係影咗好多相咋，因為唔係太多景點；平時都唔覺得呢到真係咁空... 但係今次同 Duffy 黎玩就突然覺得唔多夠野，所以，園方快啲執一執 探險世界 個格局啦！
跟住就輪到 幻想世界！其實，一入到去樂園，我地行去 反斗奇兵大本營 嗰陣有經過城堡。響城堡前，我特別幫 Duffy 影咗一張相，亦都係整個旅程中第一張幫佢影嘅相！
響 探險世界 睇完 獅子王慶典 之後就係時候開飯啦！我地去咗 幻想世界 入面嘅 皇室宴會廳。我地坐低嘅時候，坐我地旁邊嗰張枱嘅有一位姐姐，佢見到我嗰隻 Duffy 嘅時候好興奮；原來，佢都係 Duffy 嘅粉絲黎架！佢仲好好人，幫我拎起 Duffy，方便我影相。
食完飯之後就響 幻想世界 入面睇下野啦！去完參觀 小飛象 之後，再去埋 魔法師米奇 銅像。
咦！睇睇錶，夠鐘開始巡遊啦喎！於是我地就趕去巡遊路線，欣賞 迪士尼飛天巡遊。
睇完巡遊，附近有咩遊樂設施呢？不如就去 小小世界 睇下，順便涼下冷氣啦！XD
環遊全世界嘅海上之旅正式開始！講起環遊世界，除咗日本，其實我之前都帶過 Duffy 去泰國架！
坐完船仔，當然都要色彩繽紛嘅 小小世界 外牆影張相啦！Duffy 仲坐咗響廣場上望住個鐘樓添！
食飯先拎咗 小熊維尼歷險之旅 嘅 Fastpass，搞完一大輪之後，夠鐘返去玩啦！
Duffy 同 Pooh 都係好朋友黎架，除咗大家都係熊仔之外，佢響屋企仲會同一大埋 Pooh 玩！黎到好朋友嘅主場，響等待區嘅時候梗係要細心啲睇下 Pooh 嘅故事啦！
好快就玩得，我地個蜜糖罐黎啦！我同 Duffy 坐前排，爸媽就坐後排。
最後，我地響離開 幻想世界 之前，都去睇埋 米奇幻想曲，Duffy 即時戴起劇院眼鏡。
我地選擇坐火車返去 美國小鎮大街；響 東京迪士尼樂園 佢冇得坐火車，今次坐返啦。
本身係想去 動畫藝術廊 畫畫，不過下一場要等成半個鐘，所以冇畫... 唯有去 明日世界 玩啦！不過繼續去玩之前去補給一下先，我地去咗 火箭餐廳 食下午茶，買咗水果杯同埋一杯檸檬茶。
食完野就衝去玩啦！首先去咗 巴斯光年星際歷險，幫助 巴斯 對付 索克天王！
一入到去，當然要同巨型對講機影張相啦！唔知呢部對講機高佢幾多倍呢？
好啦！話咁快就玩完，咁 Duffy 拎到幾多分呢？咦，點解得0分嘅？唔好笑佢啦，佢唔夠力拎起支雷射槍嘛！玩唔到都唔緊要，佢坐響到睇已經好開心架啦！
之後就去挑戰 飛越太空山！裡面好黑，Duffy 有啲驚，好彩有我響佢隔離陪住佢咋！雖然一開頭佢驚驚地，但係一玩完，佢就變得好興奮，覺得好刺激好好玩！不過佢都係鍾意玩 灰熊山極速礦車 多啲，因為可以見到灰熊朋友！佢話下次一定要再去搵佢地！
睇下佢，就算只係坐響到都咁興奮，就知道佢今日真係玩得好開心啦！不過係時候要走啦...
都已經係傍晚六點幾啦，要返屋企啦... 我帶佢去返 美國小鎮大街 睇多陣野就要離開樂園啦... 但係佢知道就黎要離開樂園，始終都係有啲唔開心...
為咗氹返佢開心，我就帶佢周圍參觀一下啦；仲特別帶佢去新開嘅 Victorian Collection 睇下添！
好似冇咩效喎... 佢都係好唔開心... 究竟點算好呢？ 佢點先可以開心返呢？就響呢個時候，我嘅救星出現啦！我響商店行黎行去，突然俾我見到貨架上面見到佢地！
經過我千挑萬選後，我終於都揀咗一隻，買咗佢！當 Duffy 見到呢位新嘅弟弟之後，開心返啦！佢更加變得好心急，想快啲返屋企，介紹呢位新弟弟俾其他 Duffy 家族嘅成員認識！Duffy：「好啦！香港迪士尼樂園，再見啦！我下次先再叫 Thomas 帶我黎玩啦！」
生日迪士尼之旅2012，完滿結束！之後，迪士尼黑色世界2012 將會成為焦點！敬請繼續留意！:)
沒有留言:
張貼留言