呢篇文章我係設定咗時間發表嘅，其實我昨晚就已經寫好咗... 咁點解我要特別設定時間發表呢？響呢一刻，2012年11月20日上午11:00，我正身處 香港迪士尼樂園渡假區 做緊一樣好重要嘅野；我好希望 Duffy 可以一直陪伴住我，俾幸運我... 究竟我做緊咩呢？今晚我返屋企後再同大家分享！
上年，我出咗一篇文章，係關於 Duffy 響樂園裡面過聖誕節嘅；而今年我亦再次推出2012年版本！響呢篇文章入面，我將會同大家分享下 迪士尼雪亮聖誕2012 所有關於 Duffy迪士尼小熊 嘅野！
作為一位 Duffy 粉絲，嗰日一入到樂園，我嘅第一個任務，當然就係要入商店搵新嘅 聖誕小Duffy！入到 大街糖果店，行近擺放 Duffy 嘅貨架，見到最頂有聖誕佈置，而貨架上就有好多 聖誕Duffy！
我慢慢睇清楚咁多隻 聖誕小Duffy，睇下每一隻有啲咩唔同；最後，我終於都揀到一隻俾自己。其實呢隻 聖誕小Duffy 之前響樂園推出 瘋帽子服飾 嗰陣都已經同大家講過下，今次再睇真啲啦！小Duffy 今次著住聖誕衫，帽上有一個小飾物，頸前有一個毛球，而佢嘅後面亦有 Duffy 招牌。
除咗呢隻 聖誕小Duffy 毛公仔之外，有好多 雪亮聖誕2012 嘅商品都有 Duffy 個樣響上面架！
樂園先前亦推出過一個新嘅商品系列，使用嘅圖片印有多位 迪士尼朋友，而 Duffy 都有份架！
商店內不同嘅佈置，有部份都放有 Duffy迪士尼小熊；我覺得呢隻 Duffy 響玻璃球入面好得意啊！
離開商店，我帶住屬於我嘅 聖誕小Duffy 去玩；見到 Duffy 出咗黎同賓客影相，我都響旁邊影下。我特別搵一個合適嘅角度，希望可以一次過影哂我嗰隻 聖誕小Duffy 以及同人影緊相嘅 Duffy。
之後，Duffy 見到我想一次過影哂佢地兩個，佢偷偷地轉身，向鏡頭整鬼臉！個感覺好奇妙啊！
我平時通常都唔會走去同 迪士尼朋友 影相，但今次係 Duffy，加上要去換獎品，所以就去咗合照！響同 Duffy 合照之前，我都邀請佢擺個可愛啲嘅姿勢俾我影下相，佢真係好可愛啊！>_< 呢張相可以清楚留意到，Duffy 今年套聖誕衫，同 聖誕小Duffy 毛公仔套衫係一樣架！好有意思！
剛剛提及嘅獎品，其實係響暑假嗰陣嘅 奇妙處處通 一週年抽獎獲得嘅，係精美照片一張。先前園方寄咗電郵俾我，叫我去 小鎮沖印店 換取獎品，我以為佢地已經影好咗一幅指定照片；但原來係要我同 迪士尼朋友 影完相，之後再由我自己揀相嘅，咁我當然選擇同 Duffy 合照啦！我咁耐都冇試過響 小鎮沖印店 曬相，今次終於試咗第一次！呢個用黎裝住張相嘅封套又幾靚喎！
曬出黎嘅相係有相框嘅，而家嘅主題就係 雪亮聖誕2012；相片上亦印有 迪士尼朋友 嘅簽名！
同 Duffy 合照嗰陣，特別拎住新買嘅 聖誕小Duffy 同佢一齊影相，我同 聖誕小Duffy 都好開心啊！
去到傍晚，期待以久嘅 米奇玩具舞曲 終於上演，Duffy 著住上年嘅聖誕服飾響花車上向大家揮手！
太陽落山後，可以清楚影到 Duffy 櫥窗啦 ( 日間好多時會反光 )！Duffy 櫥窗都加入咗聖誕裝飾！
玻璃球內放咗一隻隻 聖誕小Duffy，而旁邊嘅聖誕樹上亦掛有原本係電話繩嘅 迷你Duffy。
Duffy 係一隻會帶來歡欣、幸運嘅小熊；今年聖誕節，你又有冇諗住帶佢返屋企陪你渡過佳節呢？
沒有留言:
張貼留言