本身話今晚有一篇文章發表，不過返到屋企見到園方出咗最新廣告，所以原本嘅文章惟有延後啦... 雪亮聖誕2012 開始咗接近兩星期，樂園終於推出最新電視廣告啦！響YouTube可以率先欣賞到。
今次嘅廣告用咗一個好特別嘅效果，就係將整個樂園模擬為立體摺紙聖誕卡，好特別好夢幻啊！首先由 睡公主城堡 開始，米奇 米妮 響城堡前歡迎大家，之後我地就可以開始聖誕旅程啦！
之後都將焦點放返響兩個新開幕嘅主題園區，灰熊山谷、反斗奇兵大本營，繼續作為賣點。不過我覺得有少少諷刺嘅係，廣告入面刻意響兩個園區加入雪花飄散效果，同現實就有啲分別；呢兩個園區響今次活動期間都冇加入聖誕元素，希望之後會有機會啦，相信一定別有一番風味！
最後，鏡頭返到去樂園全景，有哂全部園區；一個個遊樂設施響聖誕卡上彈起，真係好得意！如果園方可以推出類似嘅立體摺紙聖誕卡，例如每個園區出一款的話，我一定會買返屋企儲起佢！
廣告入面講到「樂園不斷成長，帶動無限聖誕奇想」，雖然前後好似冇咩關聯，但聽到都好感動... 特別係一班Fans同埋演藝人員，大家都見證著呢個樂園嘅成長，睇住樂園嘅變遷，會特別感慨... 樂園用咗聖誕節呢個咁溫馨嘅節日，將樂園成長串聯起一齊；唔知點解，效果出到黎真係好動人。但係成長同時，各方面都要不斷進步啊！繼續期待 迷離莊園 快啲開幕，整個樂園就可以完完整整！
沒有留言:
張貼留言