繼續無無聊聊系列，上次就分享咗我響遊戲入面以 灰熊山谷 為設計藍本自製出黎嘅 邊域山谷。見大家好似都有啲興趣，所以今次就同大家睇下佢以前嘅樣！拆解一下佢粉飾前後嘅對比！冇錯，你冇睇錯，以下張圖正正就係響粉飾前嘅 邊域山谷，一個完全唔似主題園區嘅地方...
今次俾大家睇咗高空圖先，可以好明顯見到個佈局完全係亂黎嘅，呢個就係我兩年前嘅作品... 根本就冇完整嘅主題建築物同埋佈置響園區入面，只係求其用盡每一個空間黎放遊樂設施。其實呢個園區以前唔係叫做 邊域山谷，係叫做 Western Miner 西部採礦營，係響粉飾後先改名嘅。
當中嘅地標就係 礦山鐵道 Mining Rail，嗰陣起得好高，而家就會覺得太高啦，好影響整體景觀。響粉飾嘅時候我就將全座山夷平，然後重新起過，不過我都特別重用返原先嘅礦車同埋路軌。
呢個就係以前嘅 單軌鐵路車站，感覺上空間反而好似大啲，新嗰個響起嗰陣的確唔係幾夠位... 睇見呢張相，就諗起有一樣特點上次唔記得講，就係我響粉飾樂園之後已經全面移除所有樓梯；因為響現實嘅層面黎睇，樓梯對BB車、輪椅使用者都係好唔方便，所以我就用咗斜坡去代替。
園區入面有好多遊戲設施，基本上粉飾後嘅 邊域山谷 會有嘅遊樂設施，呢到原本就已經有。
除此之外，仲有好幾個同西部主題完全冇關嘅遊樂設施，真係似一個遊樂場多過一個主題園區。
以前響 西部採礦營 入面有一個小湖畔，可以俾賓客划下船，不過粉飾後就並冇整返一個湖；仲有唔知點解會有一個同上面嗰個 炸彈危機 一模一樣嘅設施出現，一樣嘅野點解要起兩個呢... 我自己都諗唔明點解會咁，呢一刻嘅我已經諗唔通兩年前自己嘅構想，真係搞笑，哈哈！
之後突然間會有一個小建築物，竟然係演藝人員通道嘅入口！其實我覺得外觀就唔係好差嘅... 但係我驚訝係因為呢個入口嘅位置好似唔係咁好，只係求其搵個位開個入口，唔係咁方便。再者，呢個係全個主題園區入面嘅嘅惟一演藝人員通道入口，可想而知地底通道係幾咁混亂。
上一次講過，粉飾後特別用樹木去分隔各個園區，唔會俾賓客響園區入面見到唔啱主題嘅野；粉飾前都有用樹木黎做間隔，不過真係只係純粹間隔囉，都仲係可以見到旁邊園區嘅野。再加上以前起建築物嘅時候唔係好再乎高度，起到好高，令身處旁邊園區嘅賓果更加容易見到。而粉飾後嘅樹木係有特別鋪排，同時亦降低建築物高度，咁就可以好完美咁分開每個園區嘅故事！
最後就係夜晚嘅燈光啦，都係亂黎，求其放嘅！園區入面啲燈柱甚至係多到有啲刺眼... 反而 礦山鐵道 嘅燈光效果又唔錯喎！不過唔太鍾意響山上面見到一支支燈柱，好礙眼呢...
粉飾前嘅 西部採礦營 同埋粉飾後嘅 邊域山谷 係唔係真係相差好遠呢！以前起嘅時候都冇咁講究。而家整個 Wonderland 已經粉飾咗一半，我會繼續粉飾落去嘅！之後有新進展嘅話再同大家分享！
沒有留言:
張貼留言