響每次嘅特別節慶活動開始之前，園方會慢慢逐步逐步響樂園入面設置不同嘅節日裝飾。不過，最令我佩服嘅係，響每次活動完結嘅之後嗰日，所以佈置已經可以消失得無影無蹤。佢地驚人嘅速度，之前已經見識過... 但昨日一入去就見到一樣野，真係令我佩服得五體投地！估唔到短短三日，園方清走哂所有 黑色世界 嘅裝飾之餘，更加已經將巨型聖誕樹豎立響大街上！
詭墳學院 消失了，冇得返學啦... ( 我影呢張相嗰陣有位強國人望住我，可能諗緊我響到影咩。XD )
中央廣場 嘅學院花園都唔見咗... ( 學院花園係我響故事作出黎，但我都唔知呢個位個裝飾叫咩... )
黑色力量都開始遠離 太空山，夜晚嘅燈光由綠色變返做紫藍色；飛越太空山 亦會響11月7日返黎！
黑色馬戲班 撤出 探險世界，下年究竟仲會唔會返黎呢？我都係比較希望呢個位可以變成新園區... 唔知班主佢地走之前有冇順便去埋 灰熊山谷 玩下呢？呢條路對正個入口，好方便，哈哈！
我好多時都只係將著眼點放響幕前演出嘅演藝人員，但其實幕後嘅演藝人員都為樂園做咗好多野。一班為樂園增添裝飾嘅人員，我相信佢地響深夜係分秒必爭，所以都趁呢個機會多謝佢地。期待之後可以陸續見到 雪亮聖誕2012 嘅裝飾同埋佈置響樂園入面出現，迎接呢個咁溫馨嘅節日！
沒有留言:
張貼留言