聖誕節係一個充滿歡欣嘅節日，雖然仲有一個月，但係 Duffy 佢地都好期待呢個節日嘅來臨啊！就等我同大家分享下，佢地點樣好好裝扮自己過佳節，同埋收到啲咩聖誕節禮物啦！
為咗迎接聖誕節，巨大Duffy 都戴上聖誕節領結；呢個係上年響樂園買嘅，佢上年都有戴過架！
而我今日亦都終於將先前拜託網友響 東京迪士尼海洋 購買嘅聖誕節商品，送俾 Duffy 佢地啦！先講下 小Duffy 嘅聖誕節禮物啦，上次萬聖節只係送咗貼紙俾佢，今次加碼送多一本便條簿！
兩隻 大Duffy 就各有一套全新聖誕衫做禮物！2010年響香港冇買到靚靚聖誕衫，而家當補返數啦！
兩套聖誕服飾入面，其中一套係響2010年推出嘅經典服飾，上年同埋今年聖誕節都有再度推出；至於另一套就係今年全新登場，以 Cape Cod Caroler 聖誕詩歌歌唱團 為主題嘅服飾套裝。
每套服飾都包含衣架、背景紙板各一個，兩套衫嘅衣架同埋紙板都一樣，配合返聖誕節主題架！
買過咁多套服飾俾 Duffy，每一套嘅衣架、背景紙板我都有儲返架！不知不覺間都已經有好多套...
好啦，先介紹一下經典聖誕服飾；呢套衫我係送咗俾 香港迪士尼樂園 嘅 Duffy，佢已經著住咗啦！
上衣都有好多好仔細嘅設計，例如有紐扣、花紋等等；件衫嘅質地就毛絨黎嘅，著起上黎夠哂暖！
另一件配件就係頸巾；原本係一條長長嘅白色頸巾，可以依照自己鍾意嘅方式幫 Duffy 戴起佢。
整套服飾一共有三樣配件，最後一樣係冷帽；顏色同埋圖案都好特別，最頂嘅小毛球仲好得意添！
上衣都釘咗一個寫有 東京迪士尼海洋 嘅 Duffy迪士尼小熊 招牌，其餘兩樣配件就有一個小招牌。
而另一套 聖誕詩歌歌唱團 造型服飾，配件就多好多，總共有六樣，即刻覺得好似好抵咁！上一套就送咗俾香港嘅 大Duffy，換言之，呢套服飾我就俾咗來自 東京迪士尼海洋 嘅 大Duffy。我將整套服飾分為三個層次，第一個層次就係呢件連身格仔衫，後面亦都有 米奇 頭型圖案。
之後第二個層次就係好華麗嘅歌唱袍，設計得好細緻，有啲音符圖案，後面同樣有 米奇 頭型圖案。
最後嘅第三層次就係一件披肩，又係設計得好靚！仲特別整到可以扣住件歌唱袍，唔會咁易甩。
接著落黎嘅配件就有一對鞋，以及一頂帽；著哂整套服飾，真係睇到都已經覺得暖笠笠！
不過咁多樣配件入面，我最鍾意都係呢本詩歌樂譜；Duffy 拎住樂譜，唔知佢會唱咩詩歌俾我聽呢？
同上一套經典聖誕服飾一樣，呢套服飾嘅每樣配件上面都係釘有 Duffy迪士尼小熊 招牌。
我已經為屬於自己嘅 Duffy 著好新衫，準備迎接聖誕節啦！唔知你又會選擇點樣同 Duffy 過聖誕呢？
沒有留言:
張貼留言