前幾篇文章好似都同迪士尼冇咩關係，因為園內都冇咩特別嘅事發生... 而家我要另覓新題材... 咁首先諗起嘅，就係我自己響生活中所遇到嘅事；我用其他題材寫文章，希望大家唔會覺得悶啦... 呢個月出少咗文章，一黎係因為返工後空餘時間少咗，另一方面亦係因為我諗唔到寫咩好... 可能之後多返少少時間的話，會再寫一個長篇故事，又或者再諗一啲新構思！希望我會諗到啦！
由細到大，我一直都好鍾意睇故事，書本嘅故事又好，電影嘅故事亦好，我都好鍾意睇。雖然每個故事嘅內容都唔同，但佢地都有一個相同嘅特質，就係令自己引發起好多奇想；我每一次睇故事都會幻想故事中嘅情節，亦因為咁，我嘅幻想慢慢就變成咗寫故事嘅呢個興趣。其中有一個故事係我最愛嘅，就係《小王子》，我對佢嘅熱愛令我足足買咗五本內容相同嘅書！
點解我會鍾意呢個故事呢？最主要嘅原因係，我覺得呢個故事係好與別不同，好獨特。唔知大家有冇睇過呢個故事，但其實，呢個故事係有深層次嘅意思，會出現好多令人反思嘅情節。我就唔係好明，點解呢本書成日都會被放響兒童書嘅書架上，相信大多數小朋友都唔會明佢講咩... 另一個令我鍾意呢個故事嘅原因，就係 小王子 呢個充滿純真嘅角色，令我好似見到自己嘅性格咁...
就算係超鍾意，都唔需要一個故事買五本內容相同嘅書掛？！其實又係有原因 ( 藉口 XD ) 嘅... 我嘅第一本《小王子》係響中二嗰陣買嘅，當時學校要我地買黎響英文文學堂嘅時候一齊睇；當我睇完呢個故事之後，我就開始鍾意咗呢個故事，所以我之後又買返一本中文版俾自己。咁兩本都夠啦，點解仲要買？睇開 Tho's Dreams 嘅朋友應該都知道，我係超鍾意睇人地畫嘅畫！原作版本入面已經有啲好得意嘅畫，但當我行下書局，見到有啲重畫嘅版本，我又會忍唔住買！
除此之外，我亦有兩本以《小王子》為題嘅記事簿！以下呢本係買中文版故事書嘅時候附送嘅。
呢本就係響今年書展先買嘅，兩本都設計得好靚，將《小王子》畫作融入響記事簿當中。
雖然響書展買，但係我去到而家先拆... 原來附送咗一張全年日曆紙，背面集合咗大量書中嘅畫作！
好啦，入正題啦！( 而家先至算係入正題，哈！) 點解我突然間會講起《小王子》呢個故事呢？係因為我嘅第五本《小王子》係響啱啱嗰個星期日先買嘅，究竟又有咩原因 ( 藉口 ) 令我買呢？呢本書嘅畫作其實係同原作完全一樣嘅，咁佢究竟有咩吸引到我買呢？請繼續睇落去！
呢本《小王子》嘅特別之處，就係書中嘅畫作全部都用咗立體紙藝黎呈現，睇得出係好花工夫！見到呢啲咁靚，咁有層次感嘅立體紙藝作品，即時又令我諗起 雪亮聖誕2012 電視廣告！
另外亦有一啲紙藝係設計俾小朋友作出互動，但係我都覺得好過癮，都話咗我係大細路黎架啦！
書中多個紙藝作品之中，我最鍾意嘅就係呢個！層次分明之餘，小王子 更加企響山峰上，好壯觀！
講起立體紙藝，我響中四嘅時候都做過一份立體紙藝嘅美術功課，係以「舊香港」做主題嘅。
響呢份作品入面可以見到立體嘅唐樓、舊式巴士，背景就係分咗一層層嘅山脈，以及山谷木屋區。
我仲記得細個嗰陣有一款巴士係全藍色嘅，所以就畫咗出黎，你又記唔記得呢間係咩巴士公司呢？
每次欣賞立體紙藝作品，我都覺得有啲麻煩，因為佢地往往都會彈返起，要按住先可以睇清楚；為見及此，我製作呢份作品嘅時候就特別設計到能夠扣實啲咭紙，立體效果終於可以完美呈現啦！
睇完 雪亮聖誕2012 廣告，再買咗呢本立體紙藝《小王子》，然後又睇返自己以前嘅作品；我而家心郁郁想整個 香港迪士尼樂園 紙藝添！不過工程一定非常浩大，睇怕我都係冇恆心架啦...
沒有留言:
張貼留言