金球, 金爆竹, 金光巨石... 整條大街都金光閃閃呢!

金年有福 活動星期五就開始，雖然活動內容真係毫不吸引，但我都對園內佈置仲有少少希望...  呢幾日，園方都慢慢為 美國小鎮大街 增添農曆新年色彩，米奇金光巨石 亦已經響尋日出現咗！





米奇、米妮 分別拎住不同嘅賀年食品，同大家拜年！米妮 手上嗰個 米奇頭型全盒 好得意啊！

至於嗰舊 金光巨石，我就覺得佢唔夠閃閃生輝，將實物同官方圖片比較一下，其實都差幾遠...





反而其他裝飾就好似更有睇頭，今年嘅佈置都以金色為主，小鎮廣場 比起 金光巨石 更加有氣勢！





小鎮廣場 亭內都掛滿一串串用咗金色做底色嘅爆竹，欄杆上就係 米奇金光巨石 嘅嗰個圖案。

廣場兩旁嘅 市鎮會堂、動畫藝術教室 就掛上咗賀年揮春；留意，頂端都係 金光巨石 嗰個圖案。

大街其他建築物上面嘅掛飾，今年好似比較多元化，除咗爆竹之後，仲有金球，都整得幾靚架！





街上嘅燈柱亦都掛有揮春，一路延伸至城堡嗰邊；雖然設計比較簡單，但整體效果都唔錯！





樹上就掛住 金光米奇、金球；都係簡單得黎亦幾好睇！綜合各項細節，園內佈置都俾佢過關啦！





不過，都係嗰句啦，金年有福 嘅佈置好似亦都只係局限於 美國小鎮大街，的確係比較可惜...  活動未開始，唔知有冇其他園區嘅佈置係仲未完成，但如果冇的話，就要再檢視下呢個問題啦...