繼上年嘅 灰熊山谷 預演日之後，再一次「有幸」抽中 迷離莊園 預演日嘅試玩資格... 距離上次試玩只係相隔咗一個星期，但係我已經好掛住呢個新園區！終於，第二次試玩來臨啦！2013年4月30日，我帶埋 Duffy 陪我去參加預演日活動，而我地都特別提前半個鐘響門口等候！
試玩前，當然要戴返手帶先，如果唔係入唔到去架！Duffy 話佢都想戴喎！就俾佢戴住影張相啦！
今次嘅預演日同過往兩個新園區一樣，都有派發活動指南，簡單介紹 迷離莊園 裡面各個景點。
專登提前半個鐘去到等候，係希望可以做到呢一日嘅首批 迷離大宅 乘客，可惜發生一段小插曲... 下午1:00，終於可以進入 迷離莊園，我同其他試玩賓客第一時間當然係諗住去玩 迷離大宅 啦！ 我地慢慢經過等候區，再細心聽聽 亨利爵士 嘅講解，就當所有人都去到上車嘅位置時，竟然...
首批乘客都未上到車，就出現故障！在場嘅演藝人員就話大約需時一個鐘去重新設定整個系統... 佢地都呼籲賓客首先去到園區內嘅其他景點參觀，待問題解決後先至再返黎 迷離大宅 試玩... 試玩活動只得三個鐘，響到等足一個鐘咪好浪費時間？所以我都決定離開，去食咗午餐先... 唉...
上次試玩嘅時候就未有機會品嘗 大冒險家餐廳 嘅食品，今次我特別留肚，打算黎呢到食午餐！
一入到去餐廳裡面，可以見到四個櫃檯，分別提供印尼、日本、韓國等東南亞國家嘅美食。
餐廳採用自助型式，取餐、付款後就可以拎食物去到以不同國家做主題嘅區域用餐。我最後選擇咗印度區域，而嗰日亦都有演藝人員主動走埋黎幫我拎食物同埋揀位，好好人！
我地坐低之後，Duffy 發現每張餐椅上面都印有 迷離大宅「MM」標誌！好精緻！
是日午餐：三文魚便當，配上藍莓特飲。嗰塊三文魚煎得幾好，不過啲飯就... 有進步嘅空間...
Duffy 見到嗰杯發光嘅藍莓特飲，覺得好得意！睇黎佢對會發光嘅野都好有興趣喎，哈哈！
食完飯，都仲未夠一個鐘，所以就花少少時間去睇下園區內一啲上次未去睇過嘅位置。餐廳旁邊有洗手間，外觀都設計得好有特式！呢到亦有提款機，以後唔洗專登出返大街撳錢啦！
除咗園區兩邊入口，呢邊都有另一道大門，不過呢道門正常都唔會打開，因為係通往後台區域嘅。
講起大門，呢一日我都有走去 反斗奇兵大本營 嗰邊嘅門前望下；一門相隔嘅情景好快就會消失！
仲未有得玩 迷離大宅，就繼續響園區裡面周圍行下，之後就黎到放滿藝術品嘅 奇幻庭園！
咦！點解有三塊分開咗嘅石版？點解會有三尊分開咗嘅銅像？點解地面會有一幅睇唔明嘅畫？
只要響指定位置觀賞，所有藝術品嘅真面目就會呈現出黎！好有趣嘅視覺效果！
睇完藝術品，再仔細睇真啲周圍佈置，都會發現好多得意嘅物件，其中一樣就係呢啲圓形嘅掛燈！
放置響路邊嘅長椅都整得好細緻，刻有 迷離莊園「MP」標誌，Duffy 都忍唔住要坐低影返張相！
另一樣我覺得都幾靚嘅，竟然係垃圾箱！用咗紫色做主色，貼有 迷離莊園 花紋圖案！
經過 迷離大宅 前面，又點可以唔影相呢？事隔七個月，Duffy 再次同 迷離大宅 合照！上次帶佢入園玩，響大宅前面影相，嗰陣都仲有好多工程設備，今次就係完美嘅面貌！
好啦！我地繼續去到 迷離莊園 嘅最後一個景點，貨運火車站！呢到有好多剛剛卸下嘅珍藏品！
呢啲巨型珍藏品有一個共通點，就係有位置俾你伸個頭出黎影相，同 灰熊山谷 西部囚室 幾相似。
整個貨運站亦都佈滿木箱，裝住好多小型珍藏品，當中嘅埃及法老像就吸引咗我嘅注意。
Duffy，你坐響木箱上面做咩？唔通你都想留響 迷離莊園 入面，成為 亨利爵士 嘅珍藏品？
響呢個火車站可以見到好多珍藏品，但同時，只要將欄杆打開，呢到就會變成一個表演舞台！
一個迷你表演將會響呢到上演！開始前，亨利爵士 嘅一位子姪會首先響台上講幾句開場白！
之後佢就隆重介紹五位來自世界各地不同國家嘅貴賓！各位貴賓都著住自己民族嘅傳統服飾！
佢地會逐個逐個表演各自嘅民族舞蹈；雖然整個演出唔算好長，不過我覺得都好有新鮮感！
呢一日亦都有再次細看 貨運火車站 旁邊嘅 香港迪士尼樂園鐵路 路軌，等待火車經過嘅一刻！
火車穿過叢林，繼續向 幻想世界 出發！我仲係好期望終有一日呢到可以變成一個客運站！
一個鐘過去，迷離大宅 回復正常運作啦！但行埋去嗰陣已經有好多人等緊，最後又等咗45分鐘... 其實有一樣野唔係好明，點解遊樂設施出現問題嘅時候，佢地冇向賓客派發特別快速通行證嘅？印象中，灰熊山極速礦車 都會有類似嘅安排，希望園方響開幕後會有更好嘅應變方法啦！
再次踏進 迷離大宅，發現又加咗佈置！一入門口就見到加咗新招牌，印有 亨利爵士 嘅歡迎辭！「歡迎來到 迷離大宅，我們衷心地希望閣下欣賞本大宅為你搜羅自世界各地的珍貴文物。」
另外，冒險家協會 成員合照旁邊，就加咗一個新嘅介紹牌，講述協會嘅故事，亦有放上協會標誌。
等待區嘅畫作繼續慢慢增加，令賓客可以更深入了解 迷離大宅 裡面各樣珍藏品嘅背景資料。
上次可能太興奮，只係掛住去試坐電磁箱車，忽略咗部份畫作，所以今次要再睇清楚啲！
原來等待區內嘅其中兩幅畫作，係向大家講述 亨利爵士、阿拔 成為一對好拍擋嘅因由；阿拔 當時身陷險境，快將被大蜘蛛襲擊，最後 亨利爵士 成功拯救 阿拔，佢地自此就做咗好朋友！
另一幅我覺得好得意嘅畫作，係講述 亨利爵士 響1900年去到巴黎參加世界博覽會嘅；佢展出由自己親自設計嘅電磁箱車，令所有人慨嘆起黎，爵士亦因為咁而獲得博覽會大獎！
再一次欣賞到呢個 迷離莊園 模型，我真係覺得設計得好仔細，整得好貼近實物，好逼真！
穿越等待區後，又係時候聽聽 亨利爵士 嘅講解！阿拔，我地又見面啦，Hello，你好嗎？
阿拔，我知道你見到我同 Duffy 一定會好開心，不過都唔洗咁激動，唔好遮住螢幕啦！
上車啦！上車啦！等多咗個幾鐘，有得玩啦！點知，就黎到我上車嗰陣，又有特別事情發生... 系統又發生問題啦... 點解要咁對我... 我想玩啫... 好彩，今次嘅問題只係用咗大約10分鐘就搞掂咗！
去到登上電磁箱車嘅位置，又俾我發現到，閘門上都有 迷離大宅「MM」標誌！
上車前，又幫 Duffy 影返張相先！上次就係 灰熊山極速礦車，今次就係 迷離大宅！
乖乖坐好啦，我地啟程參觀 迷離大宅 博物館！唔知 Duffy 發現所有展品都識郁嗰陣，有咩感覺呢？
響整個預演日活動期間，我試玩咗3次 迷離大宅！我同 Duffy 仲幸運地坐到「尾班車」添！
出到去 迷離珍藏店，同樣都認真睇清楚店內嘅佈置；原來呢到都有 亨利爵士、阿拔 嘅合照！
而響呢幅合照旁邊，就有幾尊猴子石像！咦，呢幾隻猴子，好似有啲熟口熟面咁喎...
差唔多樣貌嘅猴子，仲可以響店內嘅牆紙上搵得到！猴子夾咗響 迷離莊園 花紋圖案中間！
本身仲諗住呢一日會有多啲主題商品上架，可惜暫時都未有更多新商品登場，惟有等開幕啦！
其實響店內都仲有見到一啲幾趣緻嘅個人化飾物，設計得唔錯！但係我要儲錢去東京，要忍住！
最後淨係買咗嗰條 童裝短褲 返去俾 巨大Duffy！而 Duffy 都有幫忙揀禮物俾哥哥架！
為咗補償返 迷離大宅 延遲咗一個鐘先有得玩，所以園方都特別將預演日活動延長多半小時。呢方面又做得幾好，值得一讚！時間黎到下午4:30，夠鐘走啦！離開前梗係又要影多次 迷離大宅！
但願 迷離大宅 嘅系統響未來兩星期內會變得生生性性啦，加油！迷離莊園，我地5月17日再見！
沒有留言:
張貼留言