時間的確過得好快，迷離莊園 已經開幕超過兩個月啦！唔知大家展開過幾多次奇幻歷程呢？我真係好鍾意呢個園區，無論係故事、佈置、遊樂體驗、氣氛，全部都做得好好！呢位 迷離莊園 小Fans，先前好幸運地獲得兩樣非常珍貴嘅珍藏品！今晚就想同大家分享一下！
第一樣珍藏品係 奇幻眼界遊戲卡，包裝依照 巴里猴紋音樂盒 嘅外表黎設計，都幾像真！
香港迪士尼樂園 標誌隱藏咗響盒上，而盒蓋亦都印有 迷離莊園 標誌，製作非常精緻。
打開盒子，裡面有一個紫色布袋，同樣印有 迷離莊園 標誌，並附有 迷離莊園「MP」銀章。
梗係唔少得主角：遊戲卡！整套卡一共有30張，再加一張遊戲說明及解答卡！
每張卡都有顯示一個奇幻視覺效果，等待玩家親自發掘！有啲比較明顯，亦有啲冇咁易睇... 見到呢套卡，令我諗起以前響科學館睇過嘅一個幻象展覽，不過呢套卡就加入咗園區嘅元素！我特別揀選咗自己最喜愛嘅五張遊戲卡俾大家睇下，你又睇唔睇得出當中嘅幻象呢？
1) 試說出圖中柱子之間，隱藏著甚麼？
2) 圖中究竟有多少根石柱？
3) 你能找出花叢中的食人花嗎？
4) 縱橫交錯的樹枝，你看到誰？
5) 圖中究竟有多少隻猴子阿拔呢？
另一樣有幸獲得嘅珍藏品係一個鈔票夾；呢份禮物附送一個皮袋，又印有 迷離莊園「MP」標記！
金屬製造嘅鈔票夾同樣有一個「MP」標記，背後嘅紋理亦印得好仔細，係 迷離大宅 牆紙圖案！
我用咗樂園時間表去試用呢個鈔票夾，但我諗自己最後都會唔捨得用，純收藏用途。
嗰盒遊戲卡係參加園方舉辦嘅Facebook活動而獲得，鈔票夾就係收到 奇妙處處通 信件去換領嘅。兩樣迷離珍藏品我都好喜歡！尤其係 奇幻眼界遊戲卡，因為好配合 迷離莊園 奇異幻象嘅主題！家中愈黎愈多珍藏品，或者我都可以參考 亨利爵士，響自己屋企改裝成迷你私人博物館，哈哈！
奇幻眼界遊戲卡答案：
1) 亨利爵士的側影暗藏柱子中間
2) 沒有，因為全部都是錯視圖案
3) 食人花暗藏在圖中的右下角
4) 當然就是可愛的阿拔
5) 四隻；爵士手上、大宅塔樓、左右草叢
沒有留言:
張貼留言