但係，奇妙係唔需要用錢黎換取嘅！只要運用一下想像力，我地係可以為自己帶黎奇妙時刻！今日我就去咗一個地方，嘗試咗製作有機麵包；於是，我就即刻諗到將麵糰整成一個特別模樣！
大家睇到上面嗰張相片，有冇邊一舊麵糰吸引到你嘅注意呢？留唔留意到中間嘅 大眼仔？呢排就有 怪獸大學 熱潮，再加上先前響園內畫過 大眼仔，最後就令我忽發奇想，整咗佢出黎！
除咗 大眼仔，我仲有另一個作品架！就係以下呢一舊麵糰！你又估唔估到係咩黎嘅呢？上面嗰啲芝麻係可以無視嘅，只係唔小心粘咗上去，但係整唔甩，哈哈！
將麵糰放入焗爐，過咗冇幾耐就焗好咗啦！剛才嘅麵糰經已變成一個個麵包啦！全部都變成金黃色，仲散發住香氣！好想快啲食啊！但係食之前梗係要先欣賞自己嘅製成品啦！
我嘅 大眼仔！我加咗一對角、一對手、一對腳俾佢，好彩所有部份都冇跌出黎！仲有眼球上面嘅提子乾眼珠，以及用芝麻所組成嘅嘴巴，焗完出黎嘅效果好似都唔錯喎！
好啦，係時候開估啦！究竟我嘅第二份作品係咩呢？答案就係... 一頂帽！怪獸大學 電影裡面，大眼仔 成日都戴住帽，等我都為自己製作嘅麵包 大眼仔 戴返頂帽先！
對比有戴帽同埋冇戴帽嘅麵包 大眼仔 ，你鍾意佢戴帽定係唔戴帽呢？我就覺得無論點都好得意！雖然有啲唔捨得，不過整咗出黎，都試下自己嘅手藝啦！麵包甜甜地幾好味，而且裡面仲好鬆軟！
呢個自家創作嘅 怪獸大學廚藝班 課堂，當然就不及樂園所開辦嘅咁完善，亦冇精美嘅紀念品。然而，響我嘅心目中，呢種獨一無二、自己專屬嘅體驗，先至係最珍貴嘅奇妙時刻！
沒有留言:
張貼留言