響《幸福‧童話》故事入面，就講到我已經坐火車抵達 舞濱站，東京迪士尼渡假區 近在咫尺；但其實呢晚我要搭多個站去到 新浦安站，因為今晚會入住伙伴酒店，聽日先正式入去渡假區。
伙伴酒店係響 東京迪士尼渡假區 附近嘅五間酒店，有唔少前來遊園嘅賓客都會選擇呢啲酒店。咁呢幾間伙伴酒店有咩特別呢？入到去見到個大堂，幾華麗，但好似同一般酒店冇咩分別喎！
響硬件方面，佢地係正正常常嘅酒店，冇咩 迪士尼 元素，不過佢地就有好多服務去配合渡假區。例如，大堂會有好大個廣告牌幫渡假區做宣傳，另外亦有服務處，可以索取園區地圖、最新資訊。
惟獨有一樣硬件設施係同 迪士尼 有關，就係酒店裡面會有 Disney Fantasy 商店。店內會發售 東京迪士尼渡假區 所推出嘅商品，我去嗰陣就見到 米奇家族 三十週年毛公仔。
上去房間啦！係一間非常時尚嘅客房！我好鍾意牆上嘅框框，覺得好特別！而且間房都算幾寬敞，可以方便我攤哂啲野出黎執！我實在係太多野要執啦！
房內又有一個 東京迪士尼渡假區 小型廣告牌，當然都係宣傳緊三十週年活動 幸福歡樂年！就連電視都有渡假區專用頻道發放資訊，最啱我呢啲就快會去玩嘅賓客瀏覽！
今晚要執好行裝方便聽日入去渡假區，執完之後就同 Duffy、Oswald 訓覺，儲足精神準備戰鬥！
因為要過返去渡假區裡面，過到去又要寄存行李、買門票等等，所以第一日朝早要早啲起身。梳洗後就食個簡便早餐，同埋幫 Duffy小熊 戴返條釘有徽章嘅圍巾，呢個就係佢第一日嘅造型。
我覺得伙伴酒店最便利嘅服務，就係設有穿梭巴士來往酒店以及渡假區嘅兩大主題樂園！班次都算頻密，響酒店正門就搭得到，仲要係直達樂園正門，真係好正！
坐咗大約十分鐘，巴士抵達 東京迪士尼樂園酒店，可以見到堂皇嘅 東京迪士尼樂園酒店。不過我第一日唔係去 東京迪士尼樂園，於是就繼續坐；過多五分鐘，終於到達 東京迪士尼海洋！
黎到 東京迪士尼海洋，要入場就當然要購買門票啦！同埋要處理行李箱，冇理由拎埋入去玩嘛！有一個地方可以俾我一次過搞掂哂所有野！係邊到呢？下一篇文章繼續！
沒有留言:
張貼留言