日本迪士尼商店 有趣的小飾物!

繼續有 幸福童話之旅 商品文章！今日想同大家分享兩樣來自 日本迪士尼商店 嘅小飾物！響我未作出介紹之前，就咁睇睇以下相片中嘅兩款商品，你又估唔估到係咩黎嘅呢？

第一款商品嘅主角係 三眼仔！咦？好似有啲熟口熟面...  佢地究竟係 三眼仔 定係 豆豆？

其實呢個小飾物係以 豆豆 黎做設計藍本嘅，但係就變咗做一支火箭，裝住咗三隻 三眼仔！

火箭裡面嘅 三眼仔 係拎唔到出黎嘅，冇咁過癮，不過帶佢地出街的話可以避免跌出黎，都好嘅！

日本嗰邊推出過好多融合其他 迪士尼朋友 嘅 豆豆 主題商品，我見過 小熊維尼、怪獸公司 等等...  近期，豆豆 佢地亦有唔少新造型呢！無論佢地戴咗高帽、鬍鬚，抑或眼鏡，都係咁可愛！

至於另一款小飾物就係迷你襟章；店內不同嘅位置放咗一大堆襟章，有大襟章，亦有迷你嘅。假如想擁有自己心愛嘅 迪士尼朋友 襟章，就要不斷響嗰堆襟章裡面搵，好似尋寶遊戲咁！

經過一輪搜索，最後我就搵到 小熊維尼、米奇、奇奇帝帝 迷你徽章各兩個，全部都好靚！

可惜嘅係，有部份比較熱門嘅 迪士尼朋友 襟章已經俾人買走哂...  要搵到心頭好都唔係咁易...  我另外仲買咗四款，當中包括《反斗奇兵》三眼仔公仔機、《小飛象》電影內嘅小老鼠 Timothy！

剩低嘅兩個襟章係一對熊仔黎嘅，咁佢地係邊個？暫時保持神秘，遲啲將會再同大家分享，嘿嘿！