踏進 東京迪士尼海洋海景酒店, 遠眺園內景觀!

因為將會入住 東京迪士尼海洋海景酒店 Tokyo DisneySea Hotel MiraCosta，所以黎到 東京迪士尼海洋 之後就去咗酒店。當時我拎住一個頗重嘅行李，但係要去酒店就必須行樓梯上去 ( 又或者有電梯，只係我搵唔到 )；有一位演藝人員見到我行緊上去，即時主動走埋黎幫我！看似係微不足道嘅小事，但我已經覺得好窩心！

去到大堂，呢到嘅裝潢好華麗啊！不過，參觀之前首先要放低行李，實在係好重好累贅，唔想拖住佢周圍走！正式參觀酒店大堂，東京迪士尼海洋 係一個以海洋為題材嘅主題樂園，佢嘅酒店當然都充滿大海嘅元素！位於酒店大堂正中心嘅，係一艘古式帆船；而天花板上面就畫咗好多象徵大海嘅天神。

除此之外，大堂不同位置都有其他古式擺設。例如有帝王徽號、木櫃、椅子等等。其中有一樣裝飾引起我嘅注意：今時今日，我地就可以好方便咁用房卡開門，咁以前呢？酒店前台嘅背後有一個特別木櫃，上面分開咗一格格代表每間酒店客房，每格放有一條房間鎖匙，重現昔日嘅情境；櫃頂嘅圖畫更加顯示咗一啲 迪士尼朋友 呢！

但講到我最感興趣嘅大堂裝飾，係一幅非常有趣嘅地圖畫作！米奇、唐老鴨、高飛 要出發去進行一次海上探索之旅！睇睇地圖先，佢地將會先後去到 地中海港灣  Mediterranean Harbor、美國海濱 American Waterfront、神秘島 Mysterious Island、發現港 Port Discovery、失落河三角洲 Lost Delta River、美人魚礁湖 Mermaid Lagoon 以及 阿拉伯海岸 Arabian Coast！咦，咪即係 東京迪士尼海洋 嘅七大主題園區？( 睇唔清楚的話可以按圖放大 )

繼續睇下酒店嘅不同位位置先！大堂旁邊有一間商店，售賣 東京迪士尼海洋 嘅商品，當時就有 幸福歡樂年、米奇和Duffy的春日巡航 商品；呢到同時亦有少量 東京迪士尼海洋海景酒店 獨家商品，其實都幾靚，不過我最後就冇買到。

你知唔知道 Hotel MiraCosta 係咩意思呢？MiraCosta 其實係意大利文，Mira 解作觀看，Costa 解作海岸，兩個字夾埋就即係觀望海洋；但係點解係意大利文呢？遲啲會有篇文章提及到。酒店有部份客房係對正 東京迪士尼海洋 園內嘅大海，景色怡人；但係想響酒店裡面睇到海景，都唔一定要住嗰種客房嘅，只要響大堂行過少少，就會見到幾隻窗，望出去就係園區 地中海港灣 嘅海邊廣場，再望出少少就可以見到園內嘅大海架啦！

好啦，時間差唔多，東京迪士尼海洋 就黎開門啦！參觀過後就需要做返一樣非常重要嘅事項：購買門票！今次嘅 東京迪士尼之旅2013，我響 東京迪士尼渡假區 兩大主題樂園總共會玩四日，於是今次就買咗四日門票，門票上面印有三十週年標記！

之前就有部份網友睇到我張門票嘅相片，發現好似有啲古怪喎！第一樣可疑嘅地方，就係嗰邊四日門票嘅成人售價明明係16000日圓，點解我嗰張係17700日圓？唔通我俾人搵笨？另外，四日門票嘅頭兩日應該需要指定去邊一個主題樂園，點解我嗰張會寫住兩邊都去得？實情係，呢張係 東京迪士尼渡假區 迪士尼酒店 住客專享嘅四日門票，頭兩日就已經可以兩邊都去哂，但係就需要加少少錢；不過我的確有需要，要加錢都要買啦！

酒店大堂有住客專用嘅售票櫃位，購買門票之後，演藝人員就遞上英文版 東京迪士尼海洋 樂園指南、樂園時間表。因為佢知道我係買四日門票，所以都有俾埋 東京迪士尼樂園 樂園指南、樂園時間表，又係好窩心！不過 東京迪士尼樂園 嘅印刷品就開始講嗰邊嘅時候先至再分享。除咗英文版，我都有問佢攞埋日文版，點解要攞埋呢？一陣間揭曉。

樂園指南固然就會顯示園內七大主題園區嘅資訊，另外都有標示 幸福歡樂能量點 嘅位置。為配合渡假區三十週年慶典 幸福歡樂年，東京迪士尼海洋 響園內設置咗五個 幸福歡樂能量點，稍後會有專題文章作出介紹。而指南上面都有穿上三十週年黃金服飾嘅 米奇家族 合照，好靚啊！

佢地嘅樂園指南包含咗好多資訊，當中就有兩個清單，清楚標示某間商店會售賣咩類型嘅商品，同埋某間餐廳會提供咩類型嘅食品。呢頁清單嘅旁邊又有另一個列表喎！列表指出咗園內不同嘅爆谷售賣點位置，同埋每個售賣點所提供嘅爆谷口味。

上年就講過，東京嘅樂園時間表同我地好唔同，佢地嘅時間表叫做「Today」，採用全彩色印刷，通常一個月先會轉一次。六月嘅時候，特別活動 米奇和Duffy的春日巡航 舉行得如火如荼，所以封面主角就係著咗春日裝嘅 米奇。「Today」印有不同嘅表演時間、迪士尼朋友 見面時間。

假如 香港迪士尼樂園 正在舉行特別活動，樂園時間表上面會印有活動介紹，同樣地，東京嗰邊假如有特別活動，「Today」都會印有相關資訊。佢地嘅活動介紹寫得好詳細，基本上所有因應特別活動而演出嘅表演都會介紹到。

但係「Today」並唔係咁簡單！除咗活動介紹，更加會有精選商品、精選美食推介！太多商品睇到你眼花撩亂？冇問題！「Today」幫到你！太多食品搞到唔知食咩好？都冇問題！「Today」都幫到你！

咁點解要拎日文版呢？因為英文版樂園指南、樂園時間表嘅資料其實係冇咁詳細，例如唔會有爆谷售賣點資訊，而特別活動亦都只係略略提及表演時間。同埋睇下英文版 樂園時間表，設計簡單幾多！唔似得日文版設計得咁精美！所以我一定會拎日文版作為收藏用途！

就黎開園啦！要去正門排隊啦！酒店住客嘅另一個專享優待，就係可以提早二十分鐘入園；只要出示房卡以及有效門票，就可以使用專用隊列排隊。但係我仲未登記入住喎，未有房卡咁點算？唔緊要，只要出示有效門票，再話俾演藝人員知道，佢就會查看訂房名單，搵到你個名就冇問題架啦！

東京迪士尼海洋 呢一日嘅開放時間係上午09:00至下午10:00，踏正上午08:40，園方準時開放俾酒店住客入場！一入去就有好多演藝人員企響到向你揮手，歡迎你黎到呢個夢幻嘅地方！入場後，分別見到春日巡航招牌、橫幅，仲有廣闊嘅海洋！咦，但係唔見有人停低影相喎！所有人都趕住跑去同一個方向喎！究竟佢地去邊？唔理啦，跟住佢地跑啦，之後先再算...