趣怪的萬聖節主題商品, 應有盡有!

迪士尼黑色世界2013 活動開始，又等我分享一下今年嘅萬聖節商品啦！其實，有關商品自從九月頭經已陸續上架，但因為有部份商品要等到活動開始先至推出，所以我都特別等到出哂先至同大家分享！

萬聖節係 南瓜王阿積 嘅主場，每年都會有大量以 怪誕城之夜 為題嘅商品登場！首先同大家介紹以下呢兩隻毛公仔！

吓？怪誕城之夜 點解有 米奇 嘅？今年園方做咗一個非常特別嘅嘗試，就係將 米奇、阿積 黎一個Crossover，推出咗呢隻咁得意嘅毛公仔！米奇 所穿著嘅係黑暗禮服，嘴巴亦都被縫上，真係好似 阿積 啊！

另一隻毛公仔就係 Zero，阿積 嘅好伙伴！今年呢隻 Zero 比較細隻，但我覺得咁樣仲可愛啦！佢嘅南瓜鼻更加係閃架，就正如響電影入面，Zero 響黑暗中進行帶領！

之後就係一件 阿積 T恤，佢張開嘴巴，展現咗一個奸猾嘅表情，T恤上面亦都印有 怪誕城之夜 嘅標誌。但係最特別嘅係，呢件衫係雙面嘅！只要將T恤內外反轉，就會變成另一個圖案；阿積 改為微笑，唔知你會唔會覺得佢友善咗呢？我稱呢件T恤為「善惡阿積」。

今年都有唔少以「善惡阿積」為題嘅商品，另一款同樣可以內外反轉，就係以下呢個鎖匙扣！原先，呢個鎖匙扣係白色嘅，係友善嘅 阿積；又再將佢反轉，就會變成黑色、狡猾嘅 阿積！

接著落黎係一個電話保護殻，依然都係「善惡阿積」主題。同平時響園內發售嘅保護款一樣，包裝盒內會附有螢幕保護膜以及螢幕清潔布。呢個保護殻一半係白色，一半係黑色，都幾特別！但係，因為白色嗰邊係半透明嘅，放上手機後會變咗兩截色，好似怪怪地；所以，我要做一做勞作啦！

盒內有一張卡紙，尺寸係同手機一樣嘅，於是我就將佢剪出黎，用黎遮住手機背面嘅銀色。但記住唔好遮住個鏡頭，如果唔係就影唔到相架啦！整完之後終於冇咗兩截色，效果都算係唔錯！

輪到 Duffy迪士尼小熊 出場啦！今年佢有新衫著，就係「萬聖節之王」服飾！呢套衫嘅佩件包括：高帽、禮服、長褲。值得一提嘅係，今次呢條長褲嘅背後並無 Duffy 標誌性嘅 隱形米奇 圖案。

高帽以及禮服都釘有 Duffy迪士尼小熊 招牌！先前，有部份 Duffy 小熊毛公仔、服飾，招牌上改為簡單地標示「Disney」迪士尼，今次又變返「Disney Parks」迪士尼主題公園 啦！唔知點解，我硬係鍾意「Disney Parks」呢個字樣多啲！

話咁快，Duffy 已經著好咗呢套衫啦！佢係唔係好型仔呢？嗰個瑩光綠色嘅煲呔好搶眼！我亦都覺得禮服上面嘅蜘蛛網圖案好得意！

園方早前公佈萬聖節商品圖片嘅時候，當我第一眼見到，圖中有一樣商品即時引起我嘅注意，就係以下呢件南瓜造型T恤！因為，呢件衫同前兩年 Duffy小熊 嘅南瓜造型服飾係設計得一模一樣架！搞到我好想買返屋企同 Duffy 著埋同一件衫！點知，推出嘅時候，竟然發現原來呢件係童裝黎...  但係冇問題！我依然買咗返屋企！

其實呢件衫都真係設計得幾細緻，唔單止非常貼近原本 Duffy小熊 嘅服飾，亦印有 Duffy迪士尼小熊 標誌以及簽名！而且，T恤上面嘅縫線更加整得好仔細！順帶一提，今次係 香港迪士尼樂園 首次推出以 Duffy迪士尼小熊 做主題嘅T恤！

我就冇可能著得落童裝，咁買返去做咩？相信睇開 Tho's Dreams 嘅讀者一定會估到，我係買返去俾 巨大Duffy 穿著！佢又有新衫著啦！仲同其他 Duffy小熊 非常恰配呢！

講咗咁耐，好似都冇 米奇家族 嘅成員出現過嘅？而家就叫 鋼牙奇奇、大鼻帝帝 出黎同大家見面啦！呢對毛公仔，兩隻花栗鼠著住全新嘅萬聖節服飾，領上分別鏽有代表 Chip 嘅「C」，以及代表 Dale 嘅「D」。

呢排我愈黎愈鍾意佢地兩個！而吸引我買呢對毛公仔嘅最主要原因，係因為佢地化身成為天使與魔鬼！奇奇 變咗做天使，有一對雪白嘅翅膀；帝帝 就變咗做魔鬼，有一對黑色嘅翅膀以及長長嘅惡魔尾巴。帝帝 嘅手上亦都釘有一個招牌，正正就係今年萬聖節嘅商品主題圖片。

講到商品主題圖片，我覺得今年呢張圖都幾靚，包含咗好多有趣嘅元素，最後又令到我買咗一罐曲奇餅返去！( 我每次都係為咗個罐而買野食，我應該好好檢討下... ) 圖片上，顯示一眾 迪士尼朋友 響大街慶祝萬聖節，另外亦有趣怪幽靈響街上飄浮！今次呢罐曲奇餅有一個小驚喜，原來裡面嘅曲奇餅係南瓜圖案黎架！

除此之外，我都買咗一罐 怪誕城之夜 朱古力脆脆！( 同樣都係為咗個罐，哈哈！)罐上有好多不同嘅 阿積 表情，亦有其他電影角色，包括 Oogie Boogie！而最搞鬼嘅係，罐上嗰張圖其實係一張明信片，係可以拆出黎嘅；不過咁靚，我會選擇俾呢張明信片繼續陪伴呢個罐！

萬聖節商品就講完了！但係呢篇文章尚未完結！以上嘅商品大部份都係響9月12日八週年當日買嘅，而因為有會員生日月份優惠卷，我嗰日係瘋狂掃貨！八週年，當然就要買返隻 米奇 毛公仔鎖匙扣留念啦！

除咗鎖匙扣，另外都仲買咗一隻 米奇 手偶毛公仔！可以套響手上，響巡遊期間用黎同花車上嘅 米奇 打招呼！米奇 見到一定會好開心，哈哈！

有一樣野其實我想買好耐，係一把遮！自從上一把遮爛咗之後，我都係求其響屋企拎把遮用住先；既然有生日月份優惠，梗係要順便買返把屬於自己嘅遮！我揀咗呢把藍色、印滿 米奇 佩件嘅遮，我覺得都幾靚！園內所售賣嘅遮大部份都係自動開關嘅，只要㩒一㩒按鈕，就可以好方便咁開遮、關遮！

好啦，去到最後一樣商品啦！近期有一款專係用黎俾我地換購嘅商品推出咗，係一隻錶黎嘅；當購物滿指定金額，就可以用換購價買埋呢隻錶！不過對我黎講，最重要嘅係：錶面嘅圖案係 魔法師米奇！所以又令我愛不釋手！

手錶固之然靚，但係個鐵盒都唔差架！盒蓋嘅膠片顯示一個以 奇妙星粉 所組成嘅「D」字！充滿 迪士尼 特式！而每一邊盒面亦印有 魔法師米奇 嘅樣貌，的確好有心思！

每年萬聖節都係要我破費嘅時候，今年嘅商品設計都算係相當唔錯，最後又買咗咁多野返屋企，又係一次完滿嘅收穫！唔知你又有冇睇中啲咩野心頭好呢？