平時響樂園入面同 迪士尼朋友 見面，通常都係響日間進行；因為去到夜晚之後，佢地就會返去後台休息，唔再出黎。但黎到一年一度嘅 迪士尼黑色世界，迪士尼朋友 終於再次響晚上出黎，響 幻想世界 舉行萬聖節派對！我當然就唔會錯過呢個咁開心嘅時刻啦！
其實之前幾次入園玩，我都有帶 小南瓜Duffy 入去一齊玩，順便同佢去探下 Duffy 大哥哥！但因為 Duffy 唔係每次都會出黎，所以係需要搏一搏運氣！而我過去幾次，都係遇唔到嘅... 最後，上個星期入去，終於見到 Duffy 啦！即時幫 小南瓜Duffy 同大哥哥影返張相先！
Duffy迪士尼小熊 果然係人氣爆燈！每次出場都會吸引好多Fans排隊等佢，要同佢合照就需要預返早少少開始排隊，如果太多人的話可能會提早截龍！輪到我啦！話時話，我都好似有一段時間冇響園內見過 Duffy，等我邀請佢擺返個最可愛嘅甫士先！
好啦，搵完 Duffy，之後搵邊個好呢？萬聖節派對，又點先得我地嘅 米奇老鼠！響早上時份，佢同 米妮 會一同出現於 美國小鎮大街 小鎮廣場；而黎到晚上，佢地走到黎 幻想世界，不過就暫時分開，分別去到兩個不同嘅位置同大家影相！
當晚，米奇 好似好心急喎！我同樣邀請佢擺個甫士影相，但係我都未撳制，佢已經急不及待邀請我埋去同佢合照，哈哈！佢最後都有俾我影返張靚仔甫士相先，可惜我影得麻麻，嗚嗚...
除咗 Duffy、米奇、米妮，另外都有 鋼牙奇奇、大鼻帝帝，但係既然我之前已經響日間嗰陣影過兩隻花栗鼠仔，我就唔特別花時間排隊再影啦... 反而，睡公主城堡 嘅底下就有另一對只有 迪士尼黑色世界 活動晚上先至會出現嘅 迪士尼朋友：阿積、莎莉！佢地手拖著手，好恩愛呢！
難得黎到萬聖節見到佢地，梗係要收集返佢地嘅簽名啦！如果唔係又要等下年架啦！當 阿積 拎起支筆嘅時候，莎莉 更加特別提醒佢要拎穩啲；因為佢嗰隻由骨頭組成嘅手，拎野係會比較唔方便，好容易會跌咗支筆；莎莉 真係細心啊！
買咗呢本新嘅八週年簽名簿都冇咩點用過，今次終於用多咗一頁！我特然響到諗，假如呢本簽名簿專係用黎收集一啲特別少少嘅 迪士尼朋友 簽名，唔知幾耐先至會簽哂咁多頁呢？香港迪士尼樂園 似乎都唔係成日會有特別嘅 迪士尼朋友 現身... 不過我相信終有一日會簽得哂嘅，哈！
沒有留言:
張貼留言