阿拉伯海岸 市集中的奪寶遊戲!

繼續有 東京迪士尼海洋 嘅分享文章！今次我地又去到另一個園區：阿拉伯海岸！呢到就係 阿拉丁、茉莉公主 嘅家園！主題園區分為兩部份，其中一邊係宮殿黎嘅，不過今次暫時唔講嗰邊，先同大家去到另一邊嘅市集。

響市集呢邊嘅某個角落，有一間小商店；但嚴格黎講，其實佢又唔算係一間商店...  因為，佢主要並唔係賣野嘅，而係同大家展開奪寶遊戲！為大家介紹：Abu's Bazzar 阿布市集！

唔知大家知唔知道 阿布 係邊個呢？響電影《阿拉丁》裡面，阿拉丁 有一位可愛嘅猴子伙伴，佢就係 阿布 啦！原來呢間係佢所打理嘅市集，佢更加響店內「整理」貨品呢！

剛才講到，黎到 阿布市集 可以展開奪寶遊戲；呢到提供兩款小遊戲，宮殿寶藏 以及 詭秘蛇魔。兩個遊戲都係要收費嘅，遊玩前只要到收銀處俾錢，就會得到一張單據，跟住就可以去玩架啦！

當日我揀咗玩 宮殿寶藏，目標係要將遊戲球碌到去指定嘅窿窿入面！假如成功的話，就會獲得一份大獎，就係頭先 阿布 整理緊嘅 鋼牙奇奇 或 大鼻帝帝 夏日版毛公仔一隻！

不過唔好以為要成功係一件好簡單嘅事，我最後係...  失敗咗...  但係冇問題，阿布 非常大方，就算未能成功都可以獲得一個徽章！其實我係想要徽章多啲嘅，所以，有呢個 米奇 春日巡航徽章做禮物，我仲開心，哈哈！

獎品款式係會不定時更新嘅，朋友響暑假去嗰陣，就轉咗三十週年款式了。呢個 阿布市集，有得玩又有獎品拎返屋企，而且收費亦唔算貴，係一個唔錯嘅推介！