上星期四響樂園同網友見咗面，拎咗 Duffy 嘅禮物；原來啲禮物都幾大份，真係麻煩哂嗰位網友！不過我唔想咁早就送啲禮物俾佢地，所以拎到返屋企影張相之後就收埋咗，Duffy 佢地仲未知架！
上一次個膠袋就係萬聖節主題，今次輪到聖誕節啦！同樣都係設計得好靚，好色彩繽紛！但睇真啲，原來同之前係有唔同；就係今次並冇分開到 迪士尼樂園、迪士尼海洋 各佔一邊。今次只係印上咗 東京迪士尼渡假區 嘅標誌，兩個主題公園嘅標誌並冇出現響膠袋上面。
網友仲特別送咗 迪士尼樂園、迪士尼海洋 日文版樂園時間表 Today 各一本俾我！真係多謝你啊！今期11月封面，分別由穿上不同系列聖誕裝嘅 米奇、米妮 擔任兩本時間表嘅封面人物！
時間表入面同樣亦刊登咗大量活動圖片同埋商品圖片，令我最興奮嘅當然就係可以見到 Duffy 啦！
我考慮過之後，決定遲啲將會分開兩次去送聖誕節禮物同埋生日禮物俾 Duffy 佢地。下星期會先送聖誕節禮物，再下星期到佢地生日當日就會送埋生日禮物！唔知佢地會有咩反應呢？
2012年11月14日
之前拜託網友幫我響 東京迪士尼海洋 買啲 Duffy 商品，俾 Duffy 佢地做生日禮物同埋聖誕節禮物；佢早前就已經返咗黎，響呢到再次講聲多謝，又要幫我買又要幫我拎返黎，真係唔該哂啊！我地約好聽日會響樂園入面見面，Duffy 佢地又有禮物收，仲要每人兩份，到時一定非常開心啦！
前兩晚上過 東京迪士尼渡假區 官方網頁，去咗 Duffy 專頁，偶然發現嗰個動畫有特別嘅景象！臨近聖誕節，Duffy 基地 Cape Cod 地區開始落雪啦！仲有幻麗嘅聖誕裝飾同埋聖誕樹！
話時話，香港迪士尼樂園 嘅官網去到呢一刻都未更新 雪亮聖誕2012 嘅資料喎，點解咁遲嘅... 唔通去到活動開始日先至正式更新？唔知聽日會唔會見到一個充滿節日氣氛嘅官方網頁呢？
沒有留言:
張貼留言