迪士尼雪亮聖誕2013 今日就會隆重展開，你感受到聖誕氣氛逐漸變得濃厚嗎？雖然活動今日先至正式開始，但係象徵聖誕歡欣嘅 米奇頭型歡樂汽球，早前經已率先衝出樂園，去到城中與所有人一同迎接聖誕節嘅來臨！
今年，香港迪士尼樂園 再度與位於尖沙咀嘅 海港城 合作，響商場嘅戶外露天廣場展示特別嘅聖誕主題裝飾！不過，響呢個大型佈置正式開放嘅前夕，園方都舉行咗一個特別嘅宣傳項目，更加走遍維港兩邊海岸！
2013年11月6日，米奇、米妮 登上一架雪亮聖誕主題巴士，先後去到銅鑼灣以及尖沙咀呢兩個城中熱點同大家見面！因為中午時段要返學，所以我就冇去到銅鑼灣「追星」，不過放學之後就即刻搭車去到尖沙咀，一睹兩位老鼠明星嘅光采！
睇下！馬路上有一架紫色嘅開蓬巴士，上層仲坐咗好多人，好似熱鬧喎！仔細睇真啲巴士路線牌，冇號碼架喎... 但係就有 香港迪士尼樂園 嘅招牌！冇錯啦，呢架就係 米奇、米妮 所乘搭嘅巴士！
一眾Fans早就已經企響路邊等待兩位巨星！當巴士駛到嘅時候，現場情緒變得非常高漲！米奇、米妮 見到大家嘅反應咁熱烈、佢地兩個都覺得好興奮呢！
整個宣傳項目大約歷時二十分鐘，期間，呢架巴士都重覆沿著廣東道行走，俾更多人有機會見到 米奇、米妮！去到街尾，巴士又要再駛返過去街頭重新行過！
呢張相片可以見到巴士車身底部展示咗樂園景色，中間位置就有 迪士尼雪亮聖誕2013 標誌、「樂園無界 快樂無限」嘅字樣，另外仲有一啲 米奇歡樂汽球 嘅圖案！但講到最引人注目嘅，固然就係上層車尾放咗一大堆實物 米奇歡樂汽球，色彩繽紛！
兜咗幾個圈之後，巴士停咗響一間酒店前面；米奇、米妮 落車入咗去酒店裡面，咁亦都代表整個宣傳項目完滿結束！路上只係剩返一架冷清嘅巴士，哈哈！
今次項目除咗有 米奇、米妮 響巴士上面同大家見面之外，同時間，工作人員亦都響附近嘅不同位置向路人派發 米奇歡樂汽球，實實在在散播聖誕歡欣！其中一個派發位置就係響天星碼頭對出，呢到仲可以見到粉飾當中嘅 海港城 聖誕裝飾！
我同朋友都有去拎到 米奇歡樂汽球，汽球係隨機派發嘅，冇得指定顏色；我嗰個汽球係紅色嘅，都幾靚丫！拎完之後，我地就將汽球集成一小束影返張相！汽球隨風飄揚，再配合日落嘅海邊景色，感覺好柔和啊！
追完星、拎完汽球、搞咗一大輪，係時候要返屋企啦！於是，我就帶住自己嘅 米奇歡樂汽球 橫越維多利亞港！返到屋企，個汽球都繼續響我嘅房間裡面飄浮，為我帶來歡欣！
不過佢嘅壽命唔算好長，第二日起身已經見佢浮唔到... 但唔緊要啦，最重要係佢曾經陪伴過我渡過一個非常開心嘅傍晚，同埋響我間房入面陪咗我一晚！
雖然好快就漏哂氣，但佢都有留低啲小禮物俾我架！首先係一個 米奇汽球飾物，原本係用黎勾住汽球，令汽球唔會咁容易被吹走嘅；但其實都幾靚，可以留返低做收藏！另外，仲有兩張 迪士尼雪亮聖誕2013 招牌，其中一張更加印有 華特迪士尼先生 嘅話語！
"Laughter is timeless, imagination has no age, and dreams are forever."
「笑聲是沒有時限的，想像是不分年代的，而夢想也會永遠存在。」
過咗一晚，黎到2013年11月7日，另一個宣傳項目亦都會響呢一日開始，就係剛才提及 香港迪士尼樂園、海港城 所合作嘅商場佈置！當日嘅黃昏就舉行咗開幕典禮，之後，大型商場佈置就正式對公眾開放！頭先講到，拎汽球嘅嗰日就見到粉飾當中嘅聖誕佈置；就算未整好，都已經覺得好似設計得幾靚，所以我上星期五就決定再次專程去到尖沙咀睇下！
我特別揀咗夜晚先去睇嘅，聖誕裝飾梗係要著哂燈先至靚嘛！只係開放嘅第二日，現場經已人頭湧湧！雖然好多人，但係都無阻我愉快嘅心情，最後仲影咗好多相返黎添！
聖誕佈置，當然唔少得聖誕樹！現場擺放咗好多大小不同嘅聖誕樹，每一棵嘅頂端都有一粒閃爍嘅星星；至於樹身就被彩帶圍繞，發出光芒！行前啲，可以發現樹上掛住嘅裝飾係 米奇頭形 黎架！
一個 迪士尼 有份製作嘅佈置，自然就會有好多 隱形米奇、米奇頭型；不論係掛飾、旗幟、招牌，全部都可以見到 米奇 嘅蹤影！總之就係周圍都係 米奇 啦！
講到招牌，我覺得呢款金色招牌都設計得幾靚！中間有一大個 隱形米奇 之餘，整個招牌亦都充滿華麗嘅風格以及聖誕特色，最頂仲有一個 睡公主城堡 嘅圖案呢！
除咗呢款金色招牌，另外亦有兩款迷你招牌；其中一款同樣顯示 隱形米奇，並且有「Merry Christmas」聖誕快樂以及「2013」字樣，而另一款就有「HC」字樣。咁究竟「HC」係咩意思呢？就係呢個大型聖誕佈置嘅所在地，「Harbour City」海港城！
好啦，等我望向高處先！今年 迪士尼雪亮聖誕2013，米奇歡樂汽球 的確佔咗一個非常重要嘅席位！睇睇上面，一束束 米奇歡樂汽球 從禮物盒爆發出黎，都幾壯觀！
嘩，就連聖誕樹都被 米奇歡樂汽球 侵佔咗！但係... 點解感覺上同 東京迪士尼渡假區 三十週年 嘅風格咁相似嘅？事實上，我覺得園方響近期似乎係有意參考東京嗰邊嘅發展模式，商品、小食等等各方面都可以睇得到；咁其實又冇咩所謂嘅，好嘅野係值得參考嘅！
抬頭望完，又望返地面嘅裝飾先！整個戶外佈置當中嘅一大焦點就係中間嘅七個聖誕波波！每個波波都象徵著一樣值得我地慶祝嘅事情，並且會有 迪士尼朋友 代表自己所屬嘅樂園景點，現身於聖誕波波裡面！
Let's Celebrate Mischievous Fun - Stitch Encounter
為調皮慶祝 - 幸會史迪仔
Let's Celebrate Friendship - Toy Story Land
為友誼慶祝 - 反斗奇兵大本營
Let's Celebrate Imagination - Fantasyland
為想像慶祝 - 幻想世界
Let's Celebrate Achievement - Monsters University
為成就慶祝 - 怪獸大學
Let's Celebrate Adventures - Mystic Point
為探險慶祝 - 迷離莊園
Let's Celebrate Family - it's a small world
為家庭慶祝 - 小小世界
Let's Celebrate Believing - Pixie Hollow
為相信慶祝 - 仙女小亭園
咁多個聖誕波波入面，我比較鍾意 奇妙仙子 所散播嘅奇妙閃粉，閃閃生輝，好靚！同埋，阿拔 都有份參加今次嘅聖誕派對，令我覺得好意外！佢前面嗰個猴紋音樂盒更加釋放出音樂星塵，又係好靚！
一路欣賞聖誕波波一路向前走，黎到商場嘅門口，同時亦係聖誕佈置嘅盡頭；呢到有一個閣樓，而企響閣樓上面嘅，就係我地嘅主角：米奇、米妮！佢地穿起聖誕新裝，邀請大家同佢地一齊歡渡佳節！
閣樓下面係一個華麗嘅大堂，天花上嘅吊燈、左右兩邊竪立嘅聖誕樹、長長嘅階梯，全部都給予人一種堂皇嘅感覺，同時亦吸引咗好多人逗留影相！
整個聖誕佈置都睇得七七八八，最後就睇埋兩邊嘅佈景！去過 海港城 的話，應該都知道佢地條長廊一邊係響海傍，另一邊就有建築物；今次嘅佈置，靠海嗰邊係特別設計到可以見到海景嘅。
另一邊呢就係一啲樂園佈景板，展示五個主題園區嘅景色，分別係 美國小鎮大街、幻想世界、反斗奇兵大本營、灰熊山谷 以及 迷離莊園！
置身於咁靚嘅聖誕佈置之中，心中都變得好溫暖，呢個就係我鍾意聖誕節嘅原因！不過，又係時候要返屋企啦！臨走之前，我去咗海邊露台影咗最後一張相！
其實我就唔太肯定究竟呢兩個宣傳項目可唔可以成功帶動到更多人決定入園玩，感受聖誕氣氛；但毫無疑問嘅係，呢兩個項目都好有噱頭，起碼可以俾更多人見識到 迪士尼 嘅聖誕特色！參與完呢兩個宣傳項目，令我更加期待園內嘅活動！今日，就等我響園內見證雪亮聖誕開始啦！
My sister gave me that balloon,it is lovely:)
回覆刪除你姐姐對你真好!
刪除