迪士尼雪亮聖誕2013 活動開始，一眾 迪士尼朋友 穿上聖誕新裝，響 聖誕小鎮 嘅不同角落期待著你嘅來臨！聖誕節往往都係 美國小鎮大街 全年最熱鬧嘅時份，同時亦係全年最多 迪士尼朋友 現身嘅時份！見到咁多可愛嘅 迪士尼朋友，必然可以過一個更加開心嘅聖誕節！
2013年11月14日，聖誕活動開始當日，又再一早入到樂園等開門，等待期間又影返張相先！
接近上午10:00，樂園快將開放，米奇、米妮 坐咗響的士上面，出黎正門廣場主持樂園開放典禮！
呢一刻係兩位老鼠明星首次著住新嘅聖誕衫響園內現身，整個過程中，佢地都不斷向在場賓客揮手！
開放典禮過後，佢地坐車返去入面，而我地亦都可以進入樂園啦！入閘後，即刻衝去搵 米奇、米妮；我之前就畫咗一幅 米奇 穿著聖誕新裝嘅畫作，佢地兩個見到我幅畫都顯得非常興奮！
我邀請 米奇 響畫作上面簽名，佢睇起黎都相當鍾意呢幅畫，拎實之餘仲不斷向其他賓客展示，哈哈！我之後再送咗一張聖誕卡俾 米奇，當然 米妮 都有份啦！佢地兩個好高興咁拎住聖誕卡影相！
當我行埋過去同佢地合照嘅時候，米奇 失驚無神錫咗我一啖，令我覺得好驚喜！但係我要細聲啲，唔可以俾 米妮 知道，如果唔係佢會呷唶架！最後我就同佢地擁抱，完滿結束咁奇妙嘅見面時刻！
同 米奇、米妮 玩咗一陣，跟住就去咗搵 唐老鴨、黛絲！一出場，佢地兩個已經忍唔住響所有人面前黎個深情嘅一吻！聖誕節果然係一個既溫馨、又浪漫嘅節日！
輪到我同朋友影佢地嗰陣，黛絲 又再忍唔住錫多 唐老鴨 一啖，佢地兩個真係恩愛！好幸福啊！
我呢日嘅目標係要響早上影齊全部 迪士尼朋友！要達到呢個目標，影完一對又要搵另一對啦！接著落黎係 高飛、布魯托！高飛 同樣穿著亮紫服裝，布魯托 嘅頸上就有一個新嘅紫色狗牌！
跟住就有我鍾意嘅 鋼牙奇奇、大鼻帝帝！佢地不斷仲炫耀自己嘅全新煲呔！咁又難免嘅，因為個煲呔都真係幾靚，上面係有音符圖案架！
其實今次每位 迪士尼朋友 嘅聖誕新裝上面都係有音符嘅，見到啲音符就令我諗起優雅動聽嘅聖誕樂章，所以我都幾喜歡呢啲音符圖案！
我成日都話，聖誕節係屬於 Duffy迪士尼小熊 嘅節日，因為佢係響2010年嘅聖誕活動首次登陸 香港迪士尼樂園 嘅！又黎到一年一度嘅聖誕節，Duffy 都換返套聖誕衫，出黎同大家見面！
睇吓佢幾可愛！各位同我一樣都係鍾意 Duffy 嘅朋友，記得響聖誕活動期間入園搵佢啦！
影完 米奇家族 嘅所有成員，又影埋 Duffy；不過，目標尚未達到！唔好唔記得仲有薑餅人啊！雖然佢地就唔係 迪士尼朋友，但係能夠見到咁得意嘅薑餅，必定會令聖誕節變得更加完美！
黎到呢篇文章嘅最後，同場加映：聖誕米奇寫真集！
響見面嗰陣已經同我玩咗五分鐘，之後，無論係響 小鎮廣場 同其他賓客影相，抑或係出入後台嘅途中，米奇都依然不時望向我個鏡頭擺甫士！
多謝你啊，米奇！多謝你為我帶黎充滿奇妙感覺嘅一日！我地下次再見啦！
沒有留言:
張貼留言